ژنەیل کوردستان دەسکەن وە چالاکییەیل "8 مارس" وە سەردان قەور ژنە نەناسیاگەیل (وینە)
شەفەق نیوز/ (هەڵمەت ژنەیل باشوور کوردستان ئەرا پشتگیریکردن رۆژاڤا) دەسوە چالاکیەیلی ئەرا رووژ جیهانی ژن دەسوەپی کرد، وەسەردان قەور ژنەیل نەناسیای لە قەورسان مقبرة "سەیوان" لە شار سلێمانی.
ئەو ژنەیلە تاجە گوڵینە نانە بان قەورەیل، لە گامیگ ئەرا رێزگردن لە ژن و خستن رووشنایی وەبان خەباتی لە جویراجویر شوینەیل.
پەیامیگ ژنانە
بێخاڵ سابر، یەکیگ لە ژنەیلە کە لەی هەڵمەتە بەشداری کەێد، ئەرا ئاژانس شەفەق نیوز وت: گرنگی 8 مارس/ ئادار جویر رووژ جیهانی ژن، کە جویر وێستگەیگ سەرەکیە ئەرا وەردەوامی لە خەبات وەرانوەر کوشتن و بڕین نیرەیی و دووچەوەکی جەندەری و ستەم کۆمەڵایەتی، و ئیمە جویر ژن کورد، باوەڕ دیریمن کە وەدەسهاوردن یەکسانی خوەیڕاگری و یەکخستن ناوەین ژنەیل.
وتیش: ژن کورد رۆڵ خوەی لە جویراجویر چینەیل چەسپان، چ لە سیاسەت یا ئیدارە یا خەبات کۆمەڵایەتی، وەگەرد ئەوەیش، هیمان کەفێدە وەر سەختیەیل گەورەیگ، دیارترینیان تونەڕەوی لەبان چین کۆمەڵایەتی، و نەوین دادپەروەری لە فرە باوەت، ئەراوە، ئیجویر چالاکییگ پاڵپشتی لە ئامادەبوین و رۆڵ ژن لە بیناکردن کۆمەڵگا کەێد.
تونەڕەوی وەبان ژن
لە قسەیلی لەباوەت زیایبوین تونەڕەوی وەبان ژن لە هەرێم کوردستان، بێخاڵ سابر دووپات کرد کە ئەو زیایبوینە لە کوشتن و تونوتیژی خیزانی وەبان ژنەیل لە کوردستان کە دوینیمن، نشانەی رخدارە ئەرا ئەو سەختیەیلە لەڕوی ژن، و هەرچەن تەقەلایلیگ لە چین هوشیارکردن دریاس، وەلێ ئامارەیل نشان دەن کە بەرزەوبوین نیگەرانکەریگ هەس لە تاوانەیل کوشتن ژن و دەسدرویژی وەبانیان، کە جویلەیگ راسگانی لەلایەن دەسەڵات و کۆمەڵگای مەدەنی خوازێد ئەرا سنووردارکردن ئی دیاردە.
خشتەی چالاکیەیل
هەڵمەتەگە هەمیش وەردەوامە وە رێکخستن زنجیرەیگ لە چالاکیەیل ژنانە، کە تا رووژ جیهانی ژن وەردەوامە، کە چالاکیەیل لە یەک و دوو مانگ مارس/ ئادار، سەردان قەور ژنە نەناسیاگەیل لە سلێمانی هاناویان، ئیجا هەڵمەتیگ ئەلیکترۆنی فراوان ئەرا خستن رووشنایی وەبان پرسەیل ژن وە لۆگۆیگ تایبەت، کە تاجە گوڵینە ئەرا نەمرکردن یاد ژنەیل دانان.
لە سێیەی مارس/ ئادار، ئەوەسا کۆڕیگ هوشیارکردن ئەنجام دریەێد ئەرا باسکردن لە پرسەیل ژن، وە زوورکردن لەو سەختیەیلە لەڕویی، و ئەو مافەیلە کە بایەسە لەڕوی کۆمەڵایەتی و یاسایی قایمەو بکریەن.
لە چوار مارس/ ئادار، خانمە چالاکوانەیل وەرەو بنکەیل پشتگیریکردن ژنە رزگاربویەیل لە تونوتیژی روی کەن، کە چەویان کەفێدە بڕیگ لەو ژنەیلە، تا گووش لە ختوورە و زیانیان بگرن، و باس چارەسەریەیل قایمکردن مقیەتیکردن و پاڵپشتیکردن دەروینی و کۆمەڵایەتی بکەن.
لە پەنج مارس/ ئادار، وسیانیگ ناڕەزایی رێک خەن ئەرا نفرەتکردن لە زیایبوین تونوتیژی وەبان ژن، کە داوای سەختەوکردن یاسایەیل لە رویی و قایمکردن میکانیزمەیل مقیەتیکردن یاسایی ژن کریەێد.
لە شەش مارس/ ئادار، ریپیوانیگ ژنانەی گەورەیگ لە سلێمانی وەڕیەو چوود، لەناو دروشمەیل دووپاتکردن لەبان هاوکاری ناوەین ژنەیل هەڵگرن، و گرنگی رەسانن دەنگیان ئەرا دروسکەرەیل بڕیار.
لە هەشت مارس/ ئادار، چالاکییەیل رەسنە لویتکە، کە بڕیارە گردەوبوین جەماوەری وەگەرد نمایشکردن هونەری ئەرا رووژ ژن ئەنجام دریەێد، وەگەرد زنجیرەیگ لە چالاکیەیل رووشنهویری و هوشیارکردن کە رووشنایی خەنە بان رۆڵ ژن لە کۆمەڵگا و گرنگی وەجیهاوردن دادپەروەری و یەکسانی.
رووژ 8 مارس/ ئادار، رووژیگ جیهانیە ئەرا ئاهەنگ وە خەبات ژن و داواکردن مافەیلی، و لە کوردستان ئی رووژە گرنگییج تایبەت دیرێد، کە هەمیشە ژن کورد لە پیشەنگی خەبات وەرانوەر دووچەوەکی و کوشتن و بڕین بویە، چ لە مەیدان سیاسەت یا وەرگریکردن لە مافەیلی کۆمەڵایەتی.
لەبان ئەو تەقەلایل یاسایی و کۆمەڵایەتیەر وەلێ هیمان تونوتیژی وەبان ژن سەختی گەورەیگ دروس کەێد لە کوردستان، هەمیش لە کوردستان سوریا، کە لایەنەیل پەیوەندیدار بەرزەوبوین لە کوشتن و دەسدرویژیکردن توومار کەن، کە گرنگی خەسەوکردن رەنجەیل ئەرا مسۆگەرکردن ژیانیگ ئاسایشتر و دادپەروەرانە ئەرا ژن کورد چەسپنێد.
