نێچیروان بارزانی ئومید خوازێد رەفتارکردن وەگەرد پێشمەرگە جویر بەشیگ لە سیستەم وەرگری عراق بوود
شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، باس ئومید خوەی کرد ک رەفتاکردن وەزارەت وەرگری فیدراڵی وەگەرد هیزەیل پیشمەرگە، جویر بەشیگ لە سیستەم وەرگری عراق بوود. ئەوەیش لەچەوکەفتنی وەگەرد شاندیگ سەربازی و ئەمنی عراقی هات، وە سەرۆکایەتی ژەنیڕاڵ عەبدولئەمیر رەشید یارەلڵا سەرۆک ئەرکان سوپا.
سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: شاندەگە پیرووزبایی وەبوونەی ئەو ئاڵشتبوینەیل نووە کرد ک لە وەزارەت پێشمەرگەی حکومەت هەرێم کوردستان کریا، وئومید سەرکەفتن ئەرا ئەو سەرکردە و وەرپرسەیلە خوازێد ک دەسکردنە ئەرکەیلیان لە پۆستەیل.
بەیاننامەگە وتیش: شاندەگە دووپات کرد ک سەردانەگەی لە چوارچیوەی بەرنامەی هاوکاری و هەماهەنگی سوپا وەگەرد پێشمەرگە تیەێد، وئامادەیی خوەی ئەرا وەردەوامی زیایکردن گەشەی پەیوەندیەیل وهاوکاری ناوبەین وەزارەت وەرگری عراق وەزارەت پێشمەرگە ولایەنەیل پەیوەندیدار لە هەرێم کوردستان نشان دا.
