نێچیروان بارزانی و مالکی دووپات لە هاوکاری و پشتگردن ئەرا بەجەرکردن سەختیەیل کەن
2023-04-08T11:09:57+00:00
شەفەق نیوز/ نێچیروان بارزانی سەرۆک هەرێم کوردستان، ئمڕوو شەممە، چەوی کەفتە نوری مالکی سەرۆک هاوپەیمان دەوڵەت یاسا.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: لە دیدارەگە باس دویاترین گەشەیل رەوشەیل سیاسی لە عراق و سەختیەیل ئی قۆناغە کریا، و ئەو گامەیلە ک ئەرا جیوەجیکردن بەرنامەیل حکومەت فیدڕاڵی عراق بڕیاگە.
بەیاننامەگە وتیش: هەردوگ لایەنەگە دووپات لە گرنگی هاوکاری و پشتگردن هاوبەش ناوبەین هیز و لایەنەیل سیاسی عراقی کردن، ئەرا بەجەرکردن سەختیەیل و پەیاکردن چارەسەری ئەرا گرفتەیل وڵاتەگە وەهەسیگ نیشتمانپەروەری وەرپەس.
پەیوەندیەیل هەولێر و بەغدا، و دویاترین نووەوبویەیل لە ناوچەگە وەگشتی باسەیل ناو ئەو دیدارە بوین.
