نێچیروان بارزانی: وەردەوام تەقەلا ئەرا چارەکردن گرفتەیل وەرد بەغداد دەیمن
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، ئمڕوو، پیشوازی لە لۆرد تارق ئەحمەد وەزیر دەوڵەت بەریتانیا ئەرا باوەتەیل خوەرھەڵات ناوڕاس و باکوور ئەفریقا و نەتەوە یەگرتگەیل کرد.
بەیاننامەگە لە زوان لۆرد ئەحمەد لەناو دیدارەگە نشان ئارەزوو وڵاتەگەی لە گەشەپیدان پەیوەندیەیلی وەرد عراق و هەرێم کوردستان دا، وتیش: بەریتانیا وە گرنگی نووڕێدە پەیوەندیەیل ناوبەین بەغداد و هەولێر و دوینێد ک سەقامگیری و پەیوەندیەیل خوەش ناوبەین هەولێر و بەغدا هازیگ لە نواگردن سەختیەیل دەێدە عراق، و باس دەسخوەشیکردن وڵاتەگە و پاڵپشتیکردنی ئەرا چارەکردن گرفتەیل گیرهاتگ ناوبەین دوو لایەنەگە کرد.
لەناو ئەو دیدارە ک باڵیۆز بەریتانیا لە عراق و قونسوڵ گشتیی لە هەولێر ئامادەی بوین، هەردوگ لایەنەگە باس رەوشەیل سیاسی و ئابووری عراق و هەرێم کوردستان کریا، و سەرۆک نێچیروان بارزانی دووپات کرد ک هەرێم کوردستان هەمیشە تەقەلای چارەکردن گرفتەیل وەرد بەغداد، وەگەرد کارکردن ئەرا مقیەتیکردن یەکڕزی لەناو هەرێم کوردستان.
هەردوگ لایەنەگە هاوڕا بوین، ک ئارامی و سەقامگیری و چارەکردن گرفتەیل وڵاتەگە کارەیگیگن پاڵپشتی پیشکەفتن عراق و گلەوخواردنی ئەرا شوین و پایەی شایستەدار خوەی لە ناوچەگا و لە ئاست جەهانی کەێد، و دەرفەت کار و بەرهەمهاوردن و وەکارخستن سەرمایەی بیگانە لە وڵاتەگە زیای کەێد.
بەیاننامەگە وتیش: هەڵوژاردن هەرێم کوردستان، و یاسای نەفت و گاز و یاسای بوودجەی فیدڕاڵی عراقی، و پەیوەندیەیل عراق و هەرێم کوردستان وەگەرد دەوڵەتەیل هاوسا، و کاریگەری جەنگ لە ئۆکرانیا، و بڕیگ باوەت باسەیل ناو ئەو گردەوبوینە بوین.
.
