نێچیروان بارزانی پیرووزبایی لە خیزانەیل شەهیدەیل پارتی لە ٧٥مین ساڵیاد دامەزراننی کەێد
شەفەق نیوز/ نێچیروان بارزانی سەرۆک هەرێم کوردستان جیگر سەرۆک پارت دیموکرات کوردستان، ئمڕوو دووشەممە، پیرووزبایی لە خیزان و کەسوکارەیل شەهیدەیل کرد، لە یاد ١٦ی ئاب وە رەدبوین ٧٥ ساڵ وەبان دامەزرانن پارت دیموکرات کوردستان.
بارزانی لە بەیاننامەیگ رەسیە ئاژانس شەفەق نیوز وت: لە ساڵیاد دامەزرانن حزبەگەمان، گەرمترین پیرووزبایی ئەرا خیزان و کەسوکارەیل شەهیدەیل، بەڕێز سەرۆک بارزانی، نووسینگەی سیاسی، سەرکردایەتی، گشت نووسینگەیل و دەزگایلە، کادر و ئەندامەیل و پشتگیرەیل و جەماوەر پارت دیموکرات کوردستان لە هەر شوینیگ بوون پێشکەش کەم.
لە بەیاننامەگەی وە رێز و نەوازش یاد گشت شەهیدەیل کوردستان و گشت سەرکردەیل و خەباتکارەیل و پێشمەرگە کرد، ئەوانەگ گشت ژیان خوەیان دانە کوردستان.
بارزانی وتیش؛ پارت دیموکرات کوردستان حزبیگ جەماوەری زنییگە، و ئمڕوو لە دویای رەدبوین هەفتاو پەنج ساڵ لەبان دامەزراننی و وەپشتسەرنان بڕێ لە قۆناغەیل خەبات ئاشکرا و نهێنی و شۆڕشگێڕی و دەسەڵاتداری، هیمان وە پەنای نووەوبوین وەردەوامی و کونجاننی وەگەرد گیان سەردەمەگە، ری خەبات گەل کوردستان وەخاتر ئازادی پێشکەفێد.
سەرۆک هەرێم کوردستان لەی ساڵیادە، وە رێز و نەوازش سڵاو لە یاد بارزانی نەمر سەرکردە و دامەزرێنەر پارت دیموکرات کوردستان وەگەرد یاوەرەیلی و گیانیان کرد.
وتیش؛ پارت دیموکرات کوردستان شان وەشان وەرد لایەنەیل کوردستان، خوەی دامەزرێنەر و مقیەتیکەر سەرەکیە ئەرا هەسی سیاسی هەرێم کوردستان، و دەسکەفتەیل سیاسیی و مافەیل دەستووریی.
هەمیش وت: لە بنەمای باوەڕ تەواوی لە یەکڕزی گەل و یەکێتی، شان وەشان وەرد گشت لایەن و پێکهاتەیل کوردستان گام نەێد، گامەیلی ک پڕن لە ئومید و بڕوا لە ژیان و دویارووژیگ خاستر ئەرا گەل کوردستان.
بارزانی دیاری کرد ک پارت دیموکرات کوردستان خاوەن ئەزموون دەوڵەمەنیگە لە ئیدارە، ک خوەی رووشناییەگە لە هویر پارت دیموکرات کوردستان و رینمای لە دووسی ژیان لە دەسەڵاتداری، و گرنگی داین وە ئەوزەڵکردن توانایل ژن و گەنج و خوەنەوارەیل.
و نشان دا ک پارتی شیوەی ناوبەرزیگ خستە روی وڵاتەگە، و روی و پایەی لە پێشکەفتن دیاری لە کوردستان لە چینەیل دیموکراتی، ئازادی، ماف مرۆڤ و یەکسانیی دیارن ک کۆمەڵگای کوردستان وە بڕێ لە بنەمایل مرۆیی دەوڵمەن کرد.
بارزانی دیاری کرد ک دەسەیل برادەری و دووسی پارت دیموکرات کوردستان هەمیشە ئەرا گشتی وازن، وتیش؛ با جیاوازی بیاشتایمن، ک قبوڵکردن جیوازی ناوبەینمان ئەزموون و کەلتور سیاسیمان دەوڵەمەن کەێد و ناوی دیارتر کەێد و پایەکەی بتەو کەێد.
بارزانی لەی ساڵیادە جەخت لە گرنگی یەکگردن و یکڕزی و گردەوبوین گشت لایەن و پێگهاتەیل کوردستان کرد، چوینکە ئەوە تەنیا مسۆگەرییگە ئەرا مقەیەتیکردن هەسی هەرێم کوردستان و دەسکەفتەیل فیدڕاڵیی و مافەیل دەستووریی، و هەمیش ئەوە هەمیشە خوەی خاوەن هەڵمەت و وەرگریکەر و هاندەریە.
وتیش؛ هێز و پایەی پارت دیموکرات کوردستان ک لە ناخ نیشتمان پەروەری و دڵسوزی سەرکردە و ئەندام و رێکخراو و جەماوەری تیەێد، وەگەرد گونجیان بەرنامەی سیاسی، ئەو کارەیلە وەرپرسایەتی و ئەرکەیلی زیای کەێد، و یەیشە داوای پلانسازی و کارکردن زیاتر لەلیمان کەێد.
جیگر سەرۆک پارت دیموکرات کوردستان، لە کۆتایی قسەیلی، سوپاس ئەرا ئەندام و جەماوەر حزبەگە پێشکەش کرد، ک وت: هەمیشە نموونەیگ خۆڕاگری و دەسوزی و نیشتمان پەروەری و وەرپرسایەتی بوین، و گشت قوربانییگ وەخاتر ئازادکردن و سەرکەفتن کوردستان پێشکەش کردن.
