نێچیروان بارزانی: رەفتارکردن بەغداد وەرد هەرێم فرە مەرکەزیە و ئەمریکا دەسیگ لە یەکلاییکردن پرس نەفت داشت
شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، وت: گەورەترین گیچەڵ لەڕوی هەرێم کوردستان کەفێدە جیوەجی نەکردن سیستەمی فیدراڵی لە عراق، و کارکردن وە مەرکەزیەت لەلایەن بەغداد، لە خود وەختەگە ئاشکرای رۆڵ ئەمریکا و رووسیا و تورکیا کرد ئەرا دووارە هەنادرەکردن نەفت لە هەرێمەو وەڕی بەندەر جیهان.
ئەوەیش لە میوانیکردنی هات لە پەراویز کۆڕبەند هەولێر وە چاپ سێیەمی وە ناونیشان (نیگەرانی کەڵەکەبوی لەبان بانان خوەرهەڵات ناوڕاس).
نێچیروان بارزانی وتیش: گەورەترین گیچەڵ کە زیان لەلی دوینیمن، ئەوەسە کە ئیمە هەر وەناو سیستەم فیدڕاڵی دیریمن، وەلێ وە جیوەجیکردن وەوجویرە نییمن، و ئەوەگ لە عراق بوود توانیمن هەرچشتیگ ناوی بنەیمن بیجگە سیستەم فیدڕاڵی.
وتیش: بەغداد جویر سیستەم فیدڕاڵی رەفتار نیەکەێد، بەڵکم جویر دەوڵەتیگ سەروەخوەیی رەفتار کەێد و هەولێریش بەغداد وە مەرکەزیەت پەتی دوینێد، و هویچ دەوڵەتیگ فیدڕاڵی لە جەهان نییە وەیجویرە رەفتار بکەێد، وتیش: لەو سەردانەیلە ئەرا ئەورا داوا لە بەغداد کرد لە هەولێر گردەو بوون تا واتەی سیستەم فیدڕاڵی بناسن و ئی گیچەڵە بخەنە پشتسەر.
لەباوت دووارە هەناردەکردن نەفت کوردستان، سەرۆک نێچیروان بارزانی وت: تورکیا هەمیشە راگەیانیە کە ئامادەس ئەرا دووارەکردن هەناردەی نەفت هەرێم لەڕی لویلەی بەندەر جیهان.
وتیش: چەنای چەنیگ وتم نەفت چشتیگ بازرگانیە نەک چشتیگ سیاسی، و لە ئەنجام وسانن هەناردەی نەفت ولایەن عراق، وەتایبەت لەلایەن ئەندامەیل پەرلەمانەو کە رازی نەوین لەبان راسەوکردن پرۆژەی یاسای بودجە، کە گەنجینەی دەوڵەت عراق لە 19 تا 20 مليار دۆلار لەوەر وسانن هەناردەی نەفت هەرێم کوردستان زەرەد کرد.
سەرۆک هەرێم کوردستان وتیش: سەرۆک وەزیرەیل و پەرلەمان رکدار بوین لەبان راسەوکردن یاسای بودجە، و بایەسە وەکوتپڕ جیوەجی بکریەێد، و تەنیا کارەیل تەکنیکی لەی کارە مەنیەسەو، و ئیمە چەوەڕی دووارە هەناردەکردن نەفت لە وەختیگ فرە نزیک کەیمن.
دیاری کرد کە ئەمریکا جویر هاوبەشیگ سەرەکی رۆڵ هاندەریگ لە چارەکردن پرس دووارە هەناردەکردن نەفت وەزوی داشت، چوینکە بەشیگ لە کۆمپانیایل ئەمریکی کار لە چین نەفت لە هەرێم کوردستان کەن، وەگەرد رووسیا کە تەقەلا لەی چوارچیوە دا، هەمیش ئەنقەرە، و کارەگە تەنیا لەلای ئەمریکا نەوی.
