نێچیروان بارزانی: خەسەخانەیل هەرێم هانە ئامادەباشی ئەرا وەرگردن زەخمدارەیل رووداو خەسەخانەگە
شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، راگەیان خەسەخانەیل هەرێم کوردستان هانە تەواو ئامادەباشییگ ئەرا وەرگردن زەخمدارەیل رووداو ئاگرەگە لەناو خەسەخانەی ئبین خەتیب لە بەغداد پایتەخت ک ئەرا تووشهاتنەیل ڤایڕۆس کۆڕۆنا تایبەت کریاگە، و لە خود وەختەگە داوا لە لایەنە پەیوەندیدارەکان کرد ئاشکرای هووکارەیل رووداوەگە بکەن.
سەرۆک بارزانی لە بەیاننامەیگ رەسیە ئاژانس شەفەق نیوز وت: رووداو ئاگرە زیاندارەگە ک دوێەشەو لە خەسەخانەی ئبین خەتیب تایبەت وە بیماری کۆڕۆنا لە بەغداد بوی ک بویە هووکار مردن و زەخمداربوین دەیان کەس، گشتمان هەژان.
پرسەی قویل و دڵانەی خوەم لە خیزانەیل و کەسوکارەیل قوربانیەیل و گشت گەل عراق کەم و هاوخەمیانم و بەشدار خەفتیانم، نزا لە خودای گەورە کەم گیان قوربانیەیل وەڕحمەت خوەی بپوشێد و زەخمدارەیل خاسەو بکەێد.
سەرۆک هەرێم کوردستان وتیش: هەرێم کوردستان وە گشت شیوەیل ئامادەس ئەرا پێشکەشکردن گشت دەسمیەتەیل و خەسەخانەیلی وە تەواوی ئامادەن ئەڕا وەرگردن زەخمدارەیل رووداوەگە و چەودیریکردن پزشکی ئەرایان.
سەرۆک بارزانی جەخت کرد ک بایەدە لایەنە پەیوەندیدارەکان هووکارەیل رووداوەگە ئاشکرا بکەن و سزای گشت خاوەن کەموکوڕیەیل بیەن و ئەوپەڕ ریکارەیل سەڵامەتی لە گشت شوینیگ بوەن تا ئیجوور رووداوەیگ زیاندار لە هیچ شوینیگ لە وڵاتەگە دووارەو نەوود.
