نێچیروان بارزانی: ئاڵووزکردن ناکۆکیەیل ناوبەین هەولێر و بەغدا لە بەرژەوەنی هویچ لایەنەیگ نییە
شەفەق نیوز/ نێچیروان بارزانی سەرۆک هەرێم کوردستان، ئمڕوو پەنجشەممە، دووارەی دووپاتکردنی لەبان گرنگی چارەکردن ناکۆکیەیل وگرفتەیل گیرهاتگ ناوبەین حکومەت هەرێم کوردستان وحکومەت فیدراڵی کرد.
ئەوەیش لەناو چەوپیکەفتنی وەگەرد مارک برایسۆن ریچاردسۆن باڵیۆز بەریتانیا لەلای عراق وشاند یاوەری.
سەرۆکایەتی هەرێم کوردستان لە بەیاننامیگ وت: لە دیدارەگە باس دویاترین نووەبویەیل رەوشەیل عراق، و سەختیەیل وەردەم کار سیاسی، و ناکۆکیەیل هەولێر-بەغداد، ورەوش ناوخوەیی و هەڵوژاردن هاتگ هەرێم کوردستان، وچاکسازی لە وەزارەت پێشمەرگە و رێکخستن هیزەیلی، و پەیوەندیەیل ناوبەین بەریتانیا وعراق وهەرێم کوردستان کریا.
بەیاننامەگە وتیش: هەردوگ لایەنەگە رێک لەبان گرنگی ئەوە کەفتن ک هیز ولایەنەیل عراقی بڕەسنە لەیەکڕەسینەوە ئەرا وەپشتسەرنان سەختیەیل ئاسایش وسیاسی لە وڵاتەگە، وەگەرد دووپاتکردن لە گرنگی خاسەوکردن رەوش خزمەتگوزاری لە وڵاتەگە.
لەباوەت ناکۆکیەیل هەولێر-بەغداد، سەرۆک نێچیروان بارزانی دووارە دووپات لەوە کرد ک چارەکردن ناکۆکیەیل گیرهاتگ ناوبەین حکومەت هەرێم کوردستان وحکومەت فیدراڵی کلیل ئارامی وچارەی گرفتەیل عراقە، و ئاڵووزکردن ئەو ناکۆکیەیلە نیەکەفێد بەرژەوەنی هویچ لایەنەیگ وکەسیگ وەپی سەرنیەکەفێد.
گرنگی یەکگردن ناوبەین لایەنەیل کوردستانی لە بەغداد، وهاوکاری و هەماهەنگی لە چین نەهیشتن تاوان وهووشبەری، وباوەت کووچ وکووچبەری، و نووەبویەیل ناوچەگە وەگشتی، باوەتیگتر بوین لەو دیدارە.
