نێچیرڤان بارزانی: نەجمەدین کەریم جەرگەی گەنجی خوەی پێشکەشکردە شۆڕش کوردستان
شەفەق نیوز/ نێچیرڤان بارزانی سەرۆک هەرێم کوردستان، ئمڕوو شەممە، پرسەو سەرەخوەشی لە مردن نەجمەدین کەریم پارێزگار کەرکوک کرد، و ئاماژە کرد ک رەحمەتی جەرگەی گەنجی خوەی پێشکەشکردە شۆڕش کوردستان و خزمەت بارزانی نەمر کرد.
نێچیرڤان بارزانی لە بەیاننامەیگ رەسیە ئاژانس شەفەق نیوز وت: کۆچکردن دکتۆر نەجمەدین کەریم خەوەر دڵتەنکەریگە ئەرا ئیمە و گەل کوردستان، لە ناخەو سەرەخوەشی لە هاوسەرەگەی و کوڕەگانی و کەسەوکارەگانی و خەڵک کەرکوک و گەل کوردستان کەم، وهاوخەمیانم.
وتیش؛ د نەجمەدین کەریم جەرگەی گەنجی خوەی پێشکەشکردە شۆڕش کوردستان جوور پزشک زیرەکیگ و پێشمەرگەی شۆڕشی ئەیلوول و ئیجا لە شۆڕش گوڵان بەشدار بوی، و وەدڵسوزی خزمەت بارزانی نەمر لەوەخت بیماریەگەی کرد، و لە ئەمریکا جوور پزشکیک زیرەک و وتوانا کارکرد، بەڵکم قەت لە خەبات سیاسی و دبلۆماسی نەوڕیا.
و ئاماژە کرد ک دڵسوزی و گرنگی داینی وە شارەگەی، کەرکوک، وەبی سنوور بوی، ک دویای ئەوەک پۆست پارێزگار وەرگرد، کارەیل گرنگیگ ئەنجامدا و خزمەتگوزارییەیلیک پێشکەشکردە کەرکوک، بەڵکم لەوەر دویرکەفتنی وەشیوەیگ نا سروشتی لە کەرکوک، و لە رەوشیل ئاڵوزیک ک پارێزگاگە کەفتە ناویان، کاریگەری گەورایگ لەبانی داشت.
هەمیش وت؛ د نەجمەدین کەریم ئەرا کوردستان و نەتەوەگەی دڵسوز بوی، ئەراوە پەیوەندیەیل فراوانیگ وەگەرد گەلەگە و هێزو لایەنە کوردستانیەگان داشت، وەتایبەت وەگەرد سەرۆک بارزاني و رەحمەتی سەرۆک مام جەلال، و هەمیشە ئامادەی تەواوەتی بوی ئەرا ئەنجامدان ئەو ئەرکەیلەگ کەفنە گەردنی لە ئەنجام ئی پەیوەندیەیل فراوانە.
