نێچیرڤان بارزانی: چارەسەرکەردن گرفتەیل هەولێر - بەغداد خوەی کلیل ئارامی عراقە
شەفەق نیوز/ نێچیرڤان بارزانی سەرۆک هەرێم کوردستان، دووشەممە، دووپاتکرد ک چارەسەرکەردن گرفتەیل هەولێر و بەغداد خوەی کلیل ئارامی عراقە، و هەمیش خانمە نۆێنەر ئەمیندار گشتی نەتەوە یەکگرتووەکان باس لە پشتگیریکردن رێکخراوە ناودەوڵەتیەگە ئەرا گفتوگۆەیل ناوبەین هەردوگلا کرد.
سەرۆکایەتی هەرێم لە بەیاننامەیگ رەسیە ئاژانس شەفەق نیوز وت: ئمڕوو نێچیرڤان بارزانی پێشوازی لە جینین بلاسخارت نۆێنەر ئەمیندار گشتی نەتەوە یەکگرتووەکان لە عراق کرد.
وەگورەی بەیاننامەگە، بلاسخارت دووپاتکرد ک پەیوەندیە خاسەگان لەناوبەین هەولێر و بەغداد کەفێدە بەرژەوەنی گشت عراق، وهەمیش باسکرد لە پشتگیریکردن نەتەوە یەکگرتووەگان ئەرا گفتوگۆکردن لەناوبەین هەردوگلا، و ئومید خوازی ک بتوێەنن گرفتەیلیان چارەسەر بکەن.
لە کۆبونەوەگە، سەرۆک نێچیرڤان بارزانی باس لە ئومید خوەی کرد لە هاندان هەولێر و بەغداد ئەرا سەرکەفتن گفتوگۆەگە و پێشکەشکردن دەسمیەتی ئەرا چارەسەرکەردن گرفتەگان لە ناوبەینیان.
بارزانی جەختکرد ک چارەسەری یەکجاری و گشتگیر لە گرفتەیل هەولێر و بەغداد خوەی کلیل ئارامی عراق و پێکەوەژیانە، و لە رەوشە سەختەگان وڵاتەکە، وئەو سەختیەیلە ک کفنە نوای، بایەدە دەسەڵاتەیل و لایەنە عراقیەگان وە هەست وەرپرسایەتی وەگەرد رەوشەگە رەفتار بکەن و کار ئەرا چارەسەرکەردن گرفتەگان لە بنەمای دەستور بکەن و رێککەفتنەگان جیوەجی بکەن.
بەیاننامەگە وتیش؛ رەوشەبل سیاسی و ئەمنی و تەندروسی و ئابووری عراق، و نواگردن تیرۆر و ئەرکەیل هاوپەیمان ناودەوڵەتی لە عراق و هەڵبژاردن هاتگ لە وڵاتەگە و گەشەیل ناوچەگە و باوەتەیلیگ تر ک خاوەن گرنگی هاوبەشن، تەوەرەیلیگ تر بوین لە کۆبونەوەگە.
