ملوانکەگە لەناونی حزبە کوردستانیەیل لە کەرکوک بڕیاوە: هەرکە وە تەنیا چوودە هەڵبژاردن
شەفەق نیوز/ ئەو ملوانەکە ک وەناو «هاوپەیمان کوردستانی» ناسریا لەناونی حزبە کوردستانیەیل لە پارێزگای کەرکوک بڕیاوە، تا هەر یەک لەو حزبەیلە وەتەنیا بچوودە ناو هەڵبژاردنەگە ک تەگبیرە لە مانگ تەشرین یەکەم ئمساڵ ئەنجام بیریەێد.
رەسول رەئووف وەرپرس حزب سۆسیالیست دیموکراتی کوردستان لە کەرکوک ئەرا ئاژانس شەفەق نیوز وت: چشتیگ وەناو هاوپەیمان کوردستانی لە کەرکوک نەما، و دیاری کرد ک هەر حزبیگ کوردستانی ئەوەسا وە لیستیگ تەنیا چوودە ناو هەڵبژاردنەگە، و تا ئیسە چوار حزب کوردستانی لیست هەڵبژاردنی خوەی تەواو کردگە.
دەربارەی هووکارەیل رێکنەکەفتن حزبە کوردستانیەیل لەبان یەک لیست، رەئووف وت: ئیمە یەک رووژ گردەو نەویمن تا لەبان بەشداریکردن وە یەک لیست رێک بکەفیمن، و نشان دا ک هاوپەیمانە وەرینەگە وەخاتر هەڵبژاردن ئەنجومەن پارێزگایل دروس کریا.
وتیش؛ هەڵبژاردن ئیسە هەکاتی جارانی نییە چوینکە هەر کەسیگ تویەنێد رکابەری بکەێد تا کورسییگ پەرلەمانی وەدەس بارێد وەبی پشتبەسان وە حزبەیل، چوینکە دەنگەیل وەڕاستەخۆ ئەرا تاکەگە چن.
