ئەڵمانیا ئەرا نێچیروان بارزانی دووپات لە وەردەوامی هاوکاری مرۆیی وە ئاوارە و کووچبەرەیل لە هەرێم کوردستان کەێد

ئەڵمانیا ئەرا نێچیروان بارزانی دووپات لە وەردەوامی هاوکاری مرۆیی وە ئاوارە و کووچبەرەیل لە هەرێم کوردستان کەێد
2022-12-07T13:41:23+00:00

شەفەق نیوز/ نێچیروان بارزانی سەرۆک هەرێم کوردستان، نیمەڕو ئمڕوو چوارشەممە، پیشوازی لە توبیاس تونکیل سەرۆک باوەت خوەرهەڵات ناوڕاس لە وەزارەت دەرەوەی ئەڵمانیا و شاند یاوەری و قونسوڵ گشتی لە هەرێم کوردستان کرد.

لە دیدارەگە باس پەیوەندیەیل ئەڵمانیا وەرد عراق و هەرێم کوردستان کریا، و رەوشەیل ناوچەگە وە گشتی، و پەیوەندیەیل ناوبەین هەولێر و بەغدا ، و پەیوەندیەیل عراق و هەرێم کوردستان وەگەرد دەوڵەتەیل هاوسا.

سەرۆک نێچیروان بارزانی سوپاس لەو دەسمیەتیەیل سەربازی و مرۆییە کرد ک ئەڵمانیا ئەرا هەرێم کوردستانولە جەنگ دژوە تیرۆر پیشکەشیان کردیە، و کوڵەباسیگ لە سەردان دویایی ئەرا بەغداد و چەوکەفتنی وە گەورە وەرپرسەیل عراق ئەرای کرد.

توبیاس ئاشکرای بەرنامەی سەردانی ئەرا هەرێم کوردستان و ناوچەگە کرد، و باس ئارەزوو وڵاتەگەی لە وەردەوامی هاوکاری و پاڵپشتیکردن عراق و هەرێم کوردستان و چارەکردن گرفتەیل گیرهاتگ ناوبەین هەولێر و بەغدا کرد.

رەوش ئاسایش ناوچەگە وە گشتی، رەوش ئاوارە و پەنابەرەیل، و کرەسکردن زەمینەیگ ئەرا گلەوخواردنیان ئەرا میلکانیان و رێککەفتن شنگال، بەشەیلیگ لە باوەتەیل ئەو دیدارە بوین، ک دووپات لە وەردەوامی هاوکاری مرۆیی ئەڵمانی ئەرا ئاوارە و کووچبەرەیل کرد.

Shafaq Live
Shafaq Live