مەسعود بارزانی لە ساڵیاد شۆڕش ئەیلول: بنەمایگ رپ و رێکخریاگ ئەرا خەبات گەل کوردستان دانا
شەفەق نیوز - هەولێر
سەرکردەی کورد مەسعود بارزانی، ئمڕوو جمعە، بەیاننامەیگ دەرکرد وە بونەی ساڵیاد 65مین دەسوەپیکردن شۆڕش ئەیلول، لە بەیاننامەگە ئافەرین وە رۆڵ هیزەیل پێشمەرگە و جەماوەر کوردستانی کرد لە وەرگەگردن دژ وەو رژیمەیلە کە یەک لەدۊای یەک حوکم عراق کردن وەرجە ساڵ 2003.
بارزانی لە بەیاننامەگەی وت، کە ئی "شۆڕش گشتگیرە کە پێشمەرگە، و سیاسەتمەدارەیل، و رێکخراوەیل، و زانایەیل ئایینی، و مامۆستایەیل، و ئەدیبەیل، و رۊشنهویرەیل، و گەنجەیل، و ژنەیل، و گشت توێژەیل کۆمەڵگا و چینەیلی لە خەبات نەتەوەیی و دیموکراسی ئەرا گەلەیان بەشداری لەلی کردن".
هەمیش وت "شۆڕش ئەیلول لە ئیرادە و کەرامەت تاک کوردستانی و بڕوای وە خوەیەو دەرچگ، هەمیش بنەمایگ رپ و رێکخریاگ دروس کرد ئەرا وەردەوامبۊن خەبات گەل کوردستان و وسانی لە وەرانوەر ستەم و چەوسانن".
بارزانی وتیش: ئی شۆڕش مەزنە، وە بەها بەرزەیلی و ئەوەگ سەرکردایەتیی و پێشمەرگە و جەماوەر لە وەرگەگردن و رکداری بی وینە نیشانی دان، کێشەی رەوای گەلەگەمان وە گامەیل گەورایگ وەرەو نووا برد، و لە ژیر سەرکردایەتی بارزانی نەمر، شۆڕش ئەیلول بۊە سەرچەوەیگ ئەرا هاز و ئیلهام بەخشیە قۆناغەیل دۊاتر لە خەبات رزگاریخوازی گەلەگەمان و تێکۆشەرەیل کورد لە گشت بەشەیل تر کوردستان.
سەرکردەی کورد ئافەرین کرد لە "رۆڵ مێژوویی گشت ئەو پێشمەرگە و تێکۆشەرە قارەمانەیلە کە بەشداری کردن لە وەدیهاوردن ئی سەروەریی نیشتمانییە؛ چ ئەو شەهیدە نەمرەیلە بۊن کە گیان خوەیان فیدای خاک نیشتمان کردن لە شۆڕش ئەیلول و چگنە پلە بەرزەیل، یا ئەو رۆڵە شەریفەیلە کە هێمان لە ژیان مەننە چۊ وەچەودیەیل زنی لەبان مێژوو".
شۆڕش ئەیلول لە 11ی ئەیلوول/ سێپتەمبەر ساڵ 1961 وە سەرکردایەتی سەرکردەی کورد رەحمەتی مەلا مستەفا بارزانی دژ وە رژێم عراقی ئەو وەختە دەس وەپی کرد، تا بوودە یەکیگ لە دیارترین وێستگەیل خەبات نەتەوەیی کورد لە سەدەی بیسەم.
شۆڕشەگە باسی کریا وە گشتگیریی ئەرا ناوچە جیاجیایەیل کوردستان عراق، و سەرکەفت لە چەسپانن ناسنامەی نیشتمانی کوردی و رەسانن دەنگ گەل کورد ئەرا ناوەندەیل هەرێمی و ناودەوڵەتی.
بارزانی هێمایگ بۊ ئەرا ئی شۆڕشە و سەرکردە ئیلهامبەخشەی، چۊنکە بزووتنەوەی رزگاریخوازی کوردی وە قایمی و رکداریەو سەرکردایەتی کرد، و شۆڕش ئەیلول کردە مەکتەویگ ئەرا خەبات سیاسی و سەربازی، ئەوەیش هیشت تا ئمڕوویش وە ناو "شۆڕش نەمر" لە هۊرمان کوردی بناسیەێد.
