مەسعود بارزانی پەیامیگ ئەرا کۆمەڵگای ناودەوڵەتی کلکەێد لەباوەت رویداوەیل سوریا
شەفەق نيوز- هەولێر
مەسعود بارزانی سەرۆک پارت دیموکرات کوردستان، ئمڕوو سێشەممە، پەیامیگ ئەرا کۆمەڵگای ناودەوڵەتی کلکرد، لەباوەت رویداوەیل سوریا و رۆژاوا، و جەنگ ناوەین سوپای سوریا و هیزەیل سوریای دیموکرات، و داوا لەلییان کرد دەسوەجی ئەو جەنگە بووسننەو، و ئاگربەسی راگەینن.
بارزانی لە بەیاننامەیگ رەسیە ئاژانس شەفەق نیوز وت: وە نیگەرانی قویلیگ و هویردبوینی فرەیگ نووڕیمن وە دویاترین گەشەیل و رویداوەیل لە سوریا و رۆژاوا، لەی رەوشەیل ناسکە، بایەسە گشتی وە وەرپرسایەتی رەفتار بکەێد و دویر لە سووز، و دویرکەفتن لە هەر گامیگ زەرەد وە خوەشک و برایەیلمان لە رۆژاوا بڕەسنێد، کە ئەو کارە قەت قەبووڵ نەکریاس.
بارزانی وتیش: گشت رەنجەیلمان خستیمنەکار و هیمان وەردەوامین ئەرا دڵنیابوین لەوە کە خوەشک و برایەیلمان لە رۆژاوا تویش کارەسات و نەهامەتی نان، و لەلاییگ ترەک، و لە سای ئی رەوش ئاڵووزە، رخباری لە گلەوخواردن داعش و تیرۆر هەس، کە ئەویش هەڕەشەی راسگانی لەبان ئارامی و ئاسایش ناوچەگە دروس کەێد.
بارزانی داوا لە کۆمەڵگای ناودەوڵەتی و هاوپەیمان ناودەوڵەتی کرد وەرپرسایەتی خوەیان جیوەجی بکەن، و کار بکەن ئەرا وسانن گرژیی و جەنگەیل وەکوتپڕ، و راگەیانن ئاگربەسی گشتگیر، و چارەسەرکردن کێشەیل وەشیوەیگ ئاشتیانە و لەڕی گفتوگۆ.
