پۆلیس دهۆک 41 سواڵکەر دەسگیر کەێد و کلیان کەێد ئەرا دادگا
شەفەق نیوز- دهۆک
وەڕێوەبەرایەتی پۆلیس دهۆک، ئمڕوو سێشەممە، خەوەردا لە دەسگیرکردن 41 کەس وە تومەت سواڵکردن لە ناوڕاس شارەگە، دیاری کرد کە خریانەسە ناو زیندان دهۆک تا کلیان بکەن ئەرا دادگا وەپای مادەی 390 لە یاسای سزایەیل.
قسەکەر وەناو وەڕێوەبەرایەتی پۆلیس دهۆک عەقید هێمن سلێمان، ئەرا ئاژانس شەفەق نیوز وت، کە مەفرەزەیل پۆلیس تۊنستن 41 کەس وە تومەت سواڵکردن لە ناوڕاس شارەگە دەسگیر بکەن، دیاری کرد کە خریانەسە ناو زیندان دهۆک تا کلیان بکەن ئەرا دادگا وەپای مادەی 390 لە یاسای سزایەیل.
هەمیش وت کە هەڵمەت رۊوەڕۊبۊن سواڵکردن لە ماوەیگەو وەردەوامە لەناو نەخشەیگ کە وەڕێوەبەرایەتی پۆلیس دهۆک داناگەی وە ئامانج کەمەوکردن ئی دیاردە و کۆنترۆڵکردنی لەناو پارێزگاگە، و دیاری کرد کە مەفرەزەیل پۆلیس شەو گوزەشتە شمارەیگ ترەک لە تومەتبارەیل وە سواڵکردن دەسگیر کردنە، و رێکارە یاساییەیل وەرانوەریان جیوەجی کریاس.
سلێمان ئاماژە وتیش کە وەڕێوەبەرایەتی پۆلیس، ئمڕوو سێشەممە، گردەوبوینیگ وە ئامادەبۊن شمارەیگ لە ئەفسەرەیل و وەڕێوەبەر بەشەیل ساز کرد ئەرا باسکردن ریەیل زیایکردن رێکارەیل تایبەت وە رۊوەڕۊبۊن سواڵکردن و تونکردن چەودیاری لەبان ئی دیاردە، بیجگە زیایکردن هەماهەنگی لە ناوەین بەشەیل و دامەزراوە ئەمنییەیل پەیوەندیدار.
قسەکەر وەناو وەڕێوەبەرایەتی پۆلیس دهۆک داوا لە هاووڵاتییەیل کرد هاوکاری وەگەرد هیزە ئەمنییەیل بکەن و خەوەر بیەن لە سواڵکردن، ئەرا جیوەجیکردن رێکارە یاساییەیل و کەمەوکردن بڵاوبۊن ئی دیاردە.
