لە دیدارەگەی وەرد سەرۆک هەرێم.. سودانی داوای زویکردن وە دووارە بەرهەمکردن و هەناردەی نەفت کوردستان کەێد
شەفەق نیوز/ محمد شیاع سودانی سەرۆک وەزیرەیل عراق، لە دیدارەگەی ئەمڕوو شەممەر وەرد نێچیروان بارزانی سەرۆک هەرێم کوردستان دووپات لە گرنگی زویکردن وە دووارە بەرهەمکردن و هەناردەی نەفت کوردستان لەڕی بەندەر جیهان کرد.
نویسنگەی راگەیانن سودانی لە بەیاننامەیگ رەسیە ئاژانس شەفەق نیوز وت: سەرۆک ئەنجومەن وەزیرەیل، ئمڕوو، پیشوازی لە نێچیروان بارزانی سەرۆک هەرێم کوردستان کرد، کە باس لە گرنگترین باوەتەیل لە ئاست نیشتمانی کریا، و چەودیاریکردن وەڕیەوچگن بەرنامەی حکومەتی لە جویراجویر کەرت و چینەیل.
سەرۆک ئەنجومەن وەزیرەیل باس گرنگی چگن وە جیوەجیکردن رێککەفتنەیل هاوبەش، وەتایبەت لە رووشنایی واژووکردن لەبان دویایین راسەوکردن یاسای بودجەی فیدڕاڵی گشتی، و ئابووری عراقی بەرزەو کەێد و خوازینەیل خەڵک گەلمان جیوەجی بکەێد، و دووپات لە دەسکردن کۆمپانیایل نەفتی لە هەرێم کوردستان وە دووارە بەرهەمکردن نەفت، و دووارە هەناردەی لەڕی بەندەر جیهان تورکی.
لەلای خوەییش، سەرۆک بارزانی دووپات لە گرنگی پەیوەندی و هاوکار ی وەرد حکوومەت فیدڕاڵی کرد ئەرا هەماهەنگی بەرزیگ لە گشت چینەیل خزمەتگوزاریی و ئابووری، لە چوارچێوەی گەشەپیدان و پیشکەشکردن خزمەتگوزارییەیل و قایمکردن ئارامی.
ئمڕوو، حکومەت عراق ئەو راپۆرتەیل راگەیاننە رەت کرد کە وتنە گوایە ئەمریکا هەڕەشەی چەسپیان سزا لەبان عراق داگە ئەگەر دووارە هەناردەی نەفت لە هەرێم کوردستان نەکەێد.
دویەکە جومعە، ئازانس رۆیتەرز، راپۆرتیگ بڵاو کرد باس فشارەیل ئەمریکا وەلایەن دۆناڵد ترەمپ کرد لەبان حکومەت عراق، ئەرا زویکردن وە هەناردەی نەفت هەرێم کوردستان لەڕی بەندەر جیهان تورکی، یا کەفێدە نوای سزایل ئابووری هەکاتی ئیران.
رۆیتەرز لە زوان 8 سەرچەوە لە بەغدا و واشنتۆن و هەولێر، وت: وە شەیوەی راستەوخۆ زانیاری لەی باوەتە دیرێد، کە فشار زیای لەلایەن ئیدارەی ئەمریکی نوو جویلەکەر سەرەکی بوی لەپشت راگەیانن وەزیر نەفت عراق لە رووژ دووشەممەی گوزەشتە،. کە لە هەفتەی ئایندە هەناردەیل لە هەرێم کوردستان دەسوەپی کەێد.
