قەیران دارایی لە کوردستان بازاڕەیلیگ گەرمەو کەن ک دویای رمانن سەدام گومابوین
شەفەق نیوز/ قەیرانە داراییەگە ک هەرێم کوردستان وەپیا رەد بوود، بازاڕەیلیگ گەرمەو کرد ک لە نەوەتەگان گەشە کردوین، و لە دویای رمانن رژیم وەرین گوما بوبن، ک خوەی بازاڕ باڵەی دڵنگ فرووشەگانە.
ئی قەیرانە هیشت هاووڵاتییەگان کوردستان بچنە بازاڕە جەماوەریە ئەرزانەگان، ک دویای گومابوینی لە ساڵەیل گوزەیشتە، ئی بازرگانیە توێنست لەی دویاییە شوون گەورایگ لە بازاڕ دهۆک لە پشت پەتای کۆڕونا و داوەزین نرخ نەفت ئەرا خوەی پەیا بکەێد.
ئیبراهیم دهۆکی سەردان بازاڕ باڵە لەناوەند شارەگە ئەرا سەنین چشتە زمسانیەگانی کەێد، و ئەرا ئاژانس شەفەق نیوز ئووشێد؛ ئی قەیران داراییە کاریگەری فرەیگ لەبانمان داشت، و خەڵکەگە توانای سەنین دڵنگەیل نوو نەیرن، و پەنا وە بازاڕ باڵە بەن چوونکە ئەرزانە، و مارکەگانی خاسترە لەوە دڵنگەیل نووە ک لەبازاڕ هەس
دهۆکی باس نرخەیل دڵنگەگان باڵە کەێد، و ئووشێد؛ دوو پانتۆڵ و دوو کراس و یەک چاکەت وە بیس هەزار دینار سەنم، و دیاریکرد ک ئەگەر لە بازاڕ هاوردەگان بسەنیامەیان وەنە ١٠٠ دۆلار یا زیاتر دیام.
