کشتوکاڵی کوردستان ئامادەکاری ئەرا درەوکردن ٣٠ دۆنم گەنم کەێد لە خانەقین
شەفەق نیوز/ فەرمانگەی کشتوکاڵی خانەقین سەرەوە هەرێم کوردستان، ئمڕوو شەممە، تەواوکردن ئامادەکاریەیل ئەرا دەسکردن وە وەرز درو لە ١٥ی ئایار راگەیان، ئەوەیش دویای کەمکردن پلان کشتوکاڵی زمسانی وەئاست ٣٥% لەوەر چەن بارودۆخیگ.
کامەران عەبدوڵا وەڕیەوبەر فەرمانگەگە ئەرا ئاژانس شەفەق نیوز وت: فەرمانگەگەی ناچار بوی پلان زمسانی لە ناوچەیل خانەقین و قۆرەتوو و مەیدان وە ئاست ٣٥% کەمەو بکەێد، لەوەر کەم ئاوی و نەوین واران.
عەبدوڵا وتیش: پلان درەو ئی وەرزە ١٥ هەزار دۆنم لە خانەقین و ١٢ هەزار لد ناحیەی قۆرەتوو، و ٥ هەزار دۆنم لە ناحیەی مەیدان گرێدەو، و رووبەرەیل پلان زمسان گوزەشتە لە خانەقین رەسیە ٢٢ هەزار دۆنم، و ٢٥ هەزار دۆنم لە قۆرەتوو، و ٨ هەزار دۆنم لە مەیدان بوی.
هەمیش باس پشتبەسان وە پلانیگ تەواوی ئەرا مقەیەتیکردن هەڵمەت درەو لەلایەن هیزەیل سوپا و پێشمەرگە لەو ناوچەیلە کرد، و ئاسانکرسن کلکردن گەنمەگە ئەرا سایلۆی کەلار وەگورەی پلان کشتوکاڵی فیدڕاڵی.
بەرهەم گەنم پە خانەقین و ناحیەیل مەیدان و قۆرەتوو لە وەرز گوزەشتە ئەرا زیاتر لە ٣٠% داوەزیا، ک بەرهەمەگە رەسیە ٤٠ هەزار تەن، و لە وەرز ٢٠٢٠ رەسیە زیاتر لە ٦٠ هەزار تەن، ئەوەیش لەوەر هشکەساڵی.
