سلێمانی.. پێشانگای ماشین دەسکاریکریاگ 50 ماشین لەخوی گرێد کە نرخەیلیان 200 هەزار دۆلار رەد کەێد (وینە)
شەفەق نیوز - سلێمانی
خوەنەوارەیل پەیمانگای "بڕایت" لە شار سلێمانی پێشانگایگ ئەرا ماشین دەسکاریکریاگ نمایش کردن، وە بەشداریکردن 50 ماشین لە جویرەیل جیاواز، کە موتور و چوارچیوەیلیان دەسکاری کریاگە، لە وەختیگ نرخەیلیان لە ناوەین 20 هەزار دۆلار و فرەتر لە 200 هەزار دۆلارە.
پەیمانگای تەکنیکی "بڕایت"، یەکیگە لە پەیمانگایەیل فێرکاری و راهێنان چالاك لە شار سلێمانی لە هەرێم کوردستان، و گرنگی دەێد وە پەرەداین وە توانا گەنجییەیل و پیشەییەیلیان و پاڵپشتیکردن دەرچگەیل.
مستەفا نەوزاد، ئەندام دەسەی ئامادەکار ئەرا پێشانگاگە، ئەرا ئاژانس شەفەق نیوز وت، کە پێشانگاگە 50 ماشین دەسکاریکریاگ لەخوی گرێد، کە موتورەیلیان پەرە پی دریاگە و ئاڵشتکاری لە شیوەیلیان ئەنجام دریاگە، ئەرا خستنەڕوییان لە وەرانوەر هاووڵاتییەیل و ناسانن وەو دەسکارییە هونەرییەیلە کە لەبانیان ئەنجام دریاگە.
نەوزاد وتیش، کە ماشینە بەشداربویەیل جویراوجۊرن لە ناوەین (فۆرد و مووستانگ و کامارۆ و جیپ)، لە شان جۊرەیل ترەک، وە دەسنشانکردن ئەوە کە بڕیگیان لە ناوەخۆی هەرێم کوردستان دەسکاری کریانە لەبان دەس خوەنەوارەیل بەش مەکینە لە پەیمانگاگە، لە وەختیگ ماشینەیل ترەک لە دەیشت هەرێمەو رەسینە دۊای ئەوەگ خریانە وەر دەسکارییە هونەرییە پیشەییەیل.
دەسنشان ئەرا ئەوە کرد کە نرخ ماشینە نمایشکریاگەیل لە 20 هەزار دۆلار دەس وەپی کەێد، و بەرزەو بوود تا 200 هەزار دۆلار رەد کەێد، وەپەی جۊرەیلیان و ئاست ئەو دەسکارییەیلە کە لەبانیان ئەنجام دریاگە.
