سیف دهۆک لەناو بازاڕەیل کەڵەکە بوود.. جفتیارەیل داوای وسانن هاوردەکردن کەن (وینە)
شەفەق نیوز- دهۆک
جفتیارەیل لە ناوچەی بەرواری باڵا سەروە قەزای ئامێدی لە باکوور پاریزگای دهۆک، سکاڵا لە بیبازاڕی بڕەیل فرەیگ لە بەرهەم سیف ناوخۆیی و نەۊین بازاڕەیل تەواو ئەرا فرووشتنی کەن، لە وەختیگ داوا لە حکومەت کردن هاوردەکردن سیف لە ماوەی وەرز بەرهەمهاوردن قەیەغە بکەێد، و داوا لە بەرهەمکارەیل کردن کارگەیل ئەرا شەربەت و مرەبا دامەزرنن ئەرا سنووردارکردن زیانەیلیان.
جفتیار زێرەڤان بەرواری، ئمڕوو دووشەممە، ئەرا ئاژانس شەفەق نیوز وت، کە فرەتر لە 130 تەن لە سیف هێمان لەناو بازاڕ بڕفرووشی (جوملە) لە ناوچەی سێجی لە خوەرئاوای دهۆک کەڵەکە بۊە، بی بۊین بازاڕیگ ئەرا فرووشتنی، وەگەرد خاسی کوالیتی بەرهەمەگە ئەرا ئی ساڵە.
وتیش کە بەرهەمهاوردن سیف هەوەجە وە رەنج و خەرجەیل گەورایگ دیرێد کە پاچکردن دارەیل و وەشانن قڕکەرەیل و خەرجەیل بارکردن و کراکارەیل گرێدەو، و دیاری کرد کە جفتیارەیل جاروبار ناچار بوون بەرهەمەیلیان وە نرخەیلیگ بفرووشن کە خەرجەیل بەرهەمهاوردن پڕەو نیەکەێد.
بەرواری داوا لە حکومەت کرد مقیەتیکردن ئەرا بەرهەم ناوخۆیی دابین بکەێد و هاتنەناو سیف هاوردەکریاگ لە ماوەی وەرز چنین ئەرا ماوەی مانگیگ وە لای کەمەو قەیەغە بکەێد، وە شیوەیگ کە دەرفەت وە جفتیارەیل بەێد بەرهەمەیلیان بخەنە بازاڕ و زیانەیل کەمەو بکەن.
وتیش کە وەرز سیف هێمان ها لە سەرەتاگەی، و ئەو بڕەیلە کە هانە ناو بازاڕ بڕفرووشی تەنیا بەشیگ لەو بەرهەمە مەزەنەکریاگە نیشان دەن لە بەرواری باڵا و ئاواییەیل دەورگردی.
بەرواری داوا لە بەرهەمهاورەیل و خاوەن کومپانیایەیل کرد کارگەیل ئەرا پیشەسازیکردن سیف و ئاڵشتکردنی ئەرا شەربەت و مرەبا و بەرهەمەیل ترەک دامەزرنن.
لە لای خوەیەو، جفتیار ئەمین محمد وت کە نزیکەی سەعات چوار شەفەق رەسیەسە بازاڕ بڕفرووشی، و نزیکەی تەنیگ لە سیف وەرد خوەی هاوردگە، کە تۊنستگە فرەیگ لەلی بفرووشێد، لە وەختیگ بڕەیل سنوورداریگ لەلای مەنیە.
ئەرا ئاژانس شەفەق نیوز وتیش، کە نزیکەی 80 تەن لە سیف دیرێد، ناچار بۊە بەشیگ لەلی لەناو باخەیل وە نرخەیل نزمیگ بفرووشێد، وە مدوو بەرزی خەرجەیل بارکردن و نەۊین توانای لەبان کلکردن ئەو بڕەیلە کە مەننە ئەرا بازاڕەیل.
دووپات کرد کە جفتیارەیل تۊش زیانەیل گەورایگ هاتنە لە ئەنجام بەرزی نرخەیل قڕکەرەیل و خەرجەیل خزمەتکردن دارەیل و بارکردن و کرێکارەیل، و داوا لە حکومەت و وەرپرسەیل کرد هاوردەکردن سیف لە ماوەی مانگەیل دەهەم و یانزەهەم و دوانزەهەم لە ساڵ قەیەغە بکەن، ئەرا داین دەرفەتیگ وە بەرهەم ناوخۆیی تا بەرهەمەگەی بفرووشێد بکەێد.
هەرلیوا داوا لە بەرهەمهاورەیل کرد ئەو بڕە کەڵەکەبۊەیلە بسینن و هەناردەی دەیشتی بکەن، یا کارگەیل ئەرا شەربەت و مرەبا دامەزرنن، وە شیوەیگ کە بەشداری بکەێد لە هەڵگردن بەرهەم زیایە و پاڵپشتیکردن جفتیارەیل.
ناوچەی بەرواری باڵا وە یەکیگ لە دیارترین ناوچە کشتوکاڵییەیل لە پاریزگای دهۆک هەژمار کریەێد کە وە بەرهەمهاوردن سیف ناسریاس، کە ساڵانە هەزاران تەن بەرهەم تیەرێد وە سای کەشوهەوای گونجیاگ و خاکە وەبڕەگەی کە رەوشیگ لەبار ئەرا گەشەکردن دارەیل سیف و خاسی بەرەگەی دابین کەێد.
