سەرۆک هەرێم کوردستان: ئەوەسا گشت تەقەلایگ دەیمن تا شەنگال بکەیمنە پارێزگا
شەفەق نیوز/ نێچیرڤان بارزانی سەرۆک هەرێم کوردستان، ئمڕوو شەممە، دووپات کرد لە وەردەوامبوین تەقەلاگانی و کارکردنی کرد ئەرا ئەوە ک شەنگال بوودە پارێزگا، و دووارە ئاوەدانکردنەوەی ناوچە ئەیزیدیەگان کرد تا ئاوارەگان لە ئەیزیدیەگان بتوێەنن دووارە وەرەو میلیکانیان گلەو بخوەن.
نیمەڕو ئمڕوو، لە ئاوای کوجو سەروە قەزای شەنگال، رسوومەیل وەخاکسپاردن تەرم ١٠٤ لە قوربانیەیل ئەیزیدیەگان لەبان دەس داعش وەئامادەبوین زمارەی فراوانيگ لە کەسوکارەیل قوربانیەگانیان و وەرپرسەگان لە حکومەت هەرێم کوردستان وحکومەت فیدڕاڵی وەڕیەو چگ.
لە رسوومەگان وتاریگ لەلایەن نێچیرڤان بارزانی سەرۆک هەرێم کوردستان ئاڕاستە کریا، وەزوان نەوزاد هادی راوێژکارەی هەنای وت: هاوردنەوەی تەرم ئی خوەشک و برای بڕەێزە ئەرا میلکان خوەیان، خوەی وازکردن لاپەڕەی دڵتەنگکەر نوویگە لە ئەو مێژوو پڕ لە زیان و ژانەەیلە ئەرا خوەشک و برا ئەیزیدیەگانمان ک ئەڕا وەرگریکردن لە خوەیان و ئاینیان و زوانیان ئەرا دەیان جار لە فەرمانە لە شوون یەکە هاوشێوەگان کردنە.
وتیش؛ کۆمەڵگای ئەیزیدی، نموونەیگە ئەرا کۆمەڵگای ناوڕاسی و رویخوەش و ژیان دووس و مرۆیی و بەیوەیی وخاوەن ئەرزش رەنگین و پایەبەرزە، ک خوازێد وەگەرد گشتی ژیان بکەێد، وەگەرد گشت پێکهاتە و ڕەنگاوڕەنگیەگان، وە ئارامی و ئاشتی، هیچ لە ژیان و وەڕێوبردن باوەتەیل ژیانیان زیاتر سەرقاڵیان نێکەێد، و قوربانیەیل گەورایگ لە درێژایی مێژوو دان، و قوربانی وەگیان و دارایی دان، تا بتوێەنن مقەیەتی باوەڕیان و ئیمانیان وەخودا و لەبان ئەیزیدی و ئاینیان بکەن، و قەت نەوینەسە سەرچەوەیگ ئەرا گرفت یا نیگەرانی هاوسا و دەورگردیان، بەڵکم وەپێچەوانەو ک هەمیشە کارگەر ئارامی و دووسی و نموونەیگ ئەرا پێکەوەژیان بوینە.
راوێژکارەگە هەمیش وت: ئەو جینۆسایدە ک تیرۆرستەیل داعش دژوە ئەیزیدیەگان کردنەی، تەنیا تەقەلای دویاکەفتنیگ بوی ئەرا زەرەدداین کۆنەترین ئاینەیل ناوچەگە و مرۆیی، بەڵکم تەقەلای بیخودیگ بوی ئەرا زەرەدداین رەوشتە باڵاگان گەل کوردستان لە خوەشبوین و پشتگردن و پێکەوەژیان و مرۆیی و ژیان دووسی ک خوەیان شیوە وەناوبانگەگان کۆمەڵگای ئەیزیدیین.
و ئاماژە کرد؛ راسە ک تیرۆرستەیل زەرەدیگ دانە ئی رەوشتەیلە و تەقەلای سڕینیان دان، وەلی وەبی گومان ک گەلەگەمان وخوەشک برایلمان وەتایبەت ئەیزیدیەگان فرە لەو تەقەلایلە بەرزترن، و وەدریژاریی مێژوو تەنانەت کەمیگیش لە ئارەزوو و خوازینمان ئەرا ژیان و دووسیمان ئەرا مرۆیی و پێکەوەژیان نەتوێنستن کەمەو بکەن، و وەو جوورەگ ک هەمیشە وەڕیەو چک، ئەوەسا سەبووری پێکهاتەیل نەتەوەیی و ئاینی وڵاتەگە لە زیان خوەیان کەێد، و ئەوەسا وەیەکەو نواگری سەختیەگان کەیمن، و وەیەکەو تیمار زەخمەیلمان کەیمن.
راوێژکارەگە جەخت لەبان پێکەوەژیان و پشتگردن و ئەواکە قەبووڵکردن کرد، و وەت: دڵنیای ئەیزیدیەگان کەیمن ک ئەوەسا گشت تەقەلایگ دەیمن، و وەگەرد گشت لایەنە پەیوەندیدارە عراقیەگان و ناودەوڵەتیەگان تەقەلا دەیمن ک ئەیزیدیەگان هەمیشە پارێزمەند بوون، و خوەیان و گشت پێگهاتەگان و گشت گەل کوردستان دڵنیا لە ئیسە و ئایندەیان بوون، و ناوچەیل ئەیزیدیەگان دووارە ئاوەدان بکریەن، ژیان و خزمەتگوزاریەگان و ئاسایش ئەرایان بایدەو، و وەسەربەرزی و دڵنیایی و وەبی ترس بچنەو ئەرا میلیکانیان.
هەمیش وت: ئەوەسا گشت تەقەلایگ دەیمن و وەردەوام بویمن تا شەنگال بکەیمنە پارێزگا، و ئەوەسا کار کەیمن و هاوکار بویمن و هەماهەنگی وەگەرد عراق و کۆمەڵگای ناودەوڵەتی کەیمن، تا ئەیزیدیەگان و هەر پێکهاتەیگ تر نەکفنە وەر نەهامەتیگ وەی شیوە، و داوا لە حکومەت فیدڕاڵی کەیمن قەرەبوو خوەشک ویرا ئەیزیدیەگانمان بکەێد، و تیرۆرستەگان و خاوەن تاوانە جینۆسایدەگان سزای یاسایی خوەیان بووەن.
راوێژکارە سەرۆک هەرێم کوردستان داوای جیوەجیکردن رێککەفتن دویایین لەناوبەین هەرێم کوردستان و حکومەت فیدڕاڵی کرد ئەرا گونجانن رەوشەگان لە شەنگال، و حکومەت فیدڕاڵی گامەیل راسییگ وەی رویە بوەێد، و وەو شیوە ک خزمەت ئاسایش و ئارامی و ئاوەدانکردنەوەی ناوچەگە بکەێد و ئاوارەگانی بانەو، و داوا لە نەتەوە یەکگرتووەگان کرد هاوکاری و دەسمیەتی لەی باوەتە پێشکەش عراق بکەێد.
هەمیش وت: لە بنچینەی ٦٤١٧ رفیاگ لە خوەشک و برا ئەیزیدیەگان تا ئیسە ٣٥٤٣ کەس لەلیان ئازاد کریاگە، تا ٢٨٧٤ کەس لەلیان بمینێد، و دڵنیادان کەیمن ک ئیمە هەر لە تەقەلاگانمان ئەرا ئازادکردن و ئاشکراکردن چارەنووس رفیایەگان وەرداەوم بویمن و قەت واز نیاریمن.
