سەرۆک هەرێم کوردستان پیشوازی لە شاند لوبنان کەێد
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، وەگەرد شاند لوبنان وە سەرۆکایەتی وەزیر داد هینری ئەلخوری، باس باوەتەیلیگ کرد ک لەلای هەردوگ لایەنەگە گرنگە.
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: بارزانی پیشوازی لە شاند لوبنان وە سەرۆکایەتی خوری و هەر کرد ک لە سەرۆک ئەنجومەن دادوەری لوبنان و یاوەر ئەمیندار گشتی جامیعەی عەرەبی و بڕیگ لە راوێژکارەیل لەناوی بۊین، ک مکیسیگ ئەرا بەشداریکردن وە ساڵیاد رووژ دادوەری عراق جیوەجی کرد.
لە چەوپیکفتنەگە ک وەزیر داد لە هەرێم کوردستان ئامادەی بۊی، رووشنایی خریا بان سیستەم دادوەری و رەوش دەسەڵات دادوەری و دادگایلە، و رۊیەیل هاوشێوەیی لەناوبەینیان لە لوبنان و عراق و هەرێم کوردستان.
بەیاننامەگە باس کرد ک چەوپیکفتنەگە باس چینەیل هاوکاری ناوبەین دوو دەسەڵات دادوەری لوبنانی و عراقی و سوودگردن لە ئەزموون هەردوگ لایەنەگە کریا، و دووپات لە گرنگی سەروەخوەیی دەسەڵات دادوەری کریا، و هەردوگ لایەنەگە ڕێک کەفتن ک سەروەخوەیی دادوەری خوەی بنەڕەت بیناکردن دەوڵەتە.
هەردوگ لایەنەگە هەمیش باس نووەوبۊیەیل دۊیاین لە رەوشەیل سیاسی و ئەمنی لە عراق و لوبنان کردن، ک شاند لوبنان باسیگ لە تەقەلایل حکومەت لوبنان ئەرا پشتسەربان رەوشە ئابووریە سەختەیلە وئەو قەیرانەیلە ک وڵاتەگە وەپیا رەد بوود، وەگەرد باسکردن لە هەڵمەت جامیعەی عەرەبی ئەرا پشتگیریکردن دەسەڵات دادوەری لوبنانی لەی رەوشەیل ئیسە.
بارزانی سەردان شاندەگە ئەرا عراق و هەرێم کوردستان وە گرنگ دانا، وەئومید بتەوکردن هاوکاری ناوبەین عراق و هەرێم کوردستان وەگەرد لوبنان لە چین دادوەری، و باس دەور خەڵک لوبنان لە هەرێم کوردستان کرد، تایبەت لە چینەیل ئاوەدانی و خزمەتگوزاری و بانکی.
لە دیدارەگە هەمیش باس رەوش ئاوارە و پەنابەرەیل لە هەرێم کوردستان و لوبنان کریا، وەگەرد بڕیگ لەو باوەتەیلە ک لەلای هەردوگ لایەنەگە گرنگە.
