سەرۆکایەتی هەرێم کوردستان ووردەکاریەیل چەوپێکەفتن نێچیرڤان بارزانی و پاپای ڤاتیکان راگەینێد
سەرۆکایەتی هەرێم کوردستان، ئمڕوو یەکشەممە، ووردەکاریەیل چەوپێکەفتن نێچیرڤان بارزانی سەرۆک هەرێم و پاپای ڤاتیکان راگەیان، و هەمیش بارزاني دووپات نەخوازینی کرد لە کۆچبردن و دەرچگن مەسیحیەکان و نەیش ئەیزیدیەکان و نەیش خەڵک هەر پێکهاتەیگ لە وڵاتەگە، و پاپای مەزن ئەرا سەرکردایەتی کوردستان وت: جەنگ ویرانیکردن و رماننە، باوجی ئیوە شکست وە دوژمن هاوردین و دووارە ئاوەدان وڵاتەگە کەین.
سەرۆکایەتی لە بەیاننامەیگ رەسیە ئاژانس شەفەق نیوز وت: بارزانی لە فڕۆکەخانەی ناودەوڵەتی هەولێر پێشوازی لە قەداسەت پاپا فرانسیس پاپای ڤاتیکان کرد، هەنای لە فڕۆکەکە داوەزیا، دەس ئەرا زەویەگە دڕا کرد و ئەرا سەرۆک هەرێم وت: خوەشحاڵم ک لەێرا دووارە چەومان وەیەک بکەفێد.
وتیش؛ بارزانی لە کۆبونەوەیگ مەسرور بارزانی سەرۆک وەزیران، و موستەفا سەید قادر جیگر سەرۆک هەرێم کوردستان، و قوباد تاڵەبانی جیگر سەرۆک وەزیران کوردستان، و مونا قاوەچی سکرتێر پەرلەمان کوردستان لەناوی بوین، پێشوازی لە قەداسەت پاپا کرد و وت: وەناو گشت پێکهاتەیل گەل کوردستان گەرمترین پێشوازی وە قەداسەت ئیوە کەم، ک ئی سەردان ئیوە رووداو مێژووی مەنزیگە، و شایی گشت دڵخوەشی و شانازییگە ئەرامان وەجی شانازیە ئەرا گشت گەل کوردستان.
لەلاییگ تر لە وتارەگەی سەرۆک نێچیرڤان بارزانی وت: گشت باوەڕییگ وە ئازادی ئاینی و ڕەنگاوڕەنگی ئاینی دیریمن، و پێکەوەژیان و ئەواکە قەبووڵکردن لەناونی پێکهاتەکان، شناسنامە و کەلتوور رەسنیگە لە کوردستان، و وەگشت شیوەکان کار لە مقەیەتیکردن ئی کەلتوور کەیمن، و ئیمە هەمیشە هایمنە گەرد ئاشتی و گفتوگۆکردن، و رەت تیرۆر و توندڕەوەی کەیمن، و هیچ ریبگ نیەێمن ک هەر پێکهاتەیگ ئاینی یا نەتەوەیی لە کوردستان بوودە قوربانی تیرۆر و توندڕەوەی.
وتیش؛ پێکهاتەیل کوردستان وەیەکەو لە ماوەی ساڵەیل فرەیگ نوای دیکتاتۆریەت وەتیرۆر گردن، و وەیەکەو قوربانیەیل گەورایگ پێشکەش کردن، و گشتمان گوزەیشتەی هاوبەشیگ دیریمن، و گشتمان وەیەکەو کار ئەرا دویارووژ هاوبەشیگ خاستر کەیمن.
و دیاری کرد ک ڕەنگاوڕەنگی و پێکهاتە ئاینیەکان و نەتەوەیەکان سەرچەوەی هێز و دەوڵەمەندیین ئەرا هەرێم کوردستان، و نێخوازیمن نە ئەرا مەسیحیەکان و نەیش ئەیزیدیەکان لە وڵاتەکە دەرچن.
سەرۆک نێچیرڤان بارزانی لە بەشیک تر لە وتارەگەی دووپات کرد ک مەسیحیەکان پێکهاتەیگ رەسەن و سەرکیین لە کوردستان، و خوەیان کۆمەڵگایگ بی وەین، ئەوسا و ئیسەیش دەور گەورایگ لە بیناکردن و مقەیەتیکردن وڵاتەگە رانینە، و گشت توانایلمان ئەرا مقەیەتیکردنیان پێشکەش کردیمن.
لە کۆتایی، سەرۆک هەرێم کوردستان وت: سەردان قەداسەت ئیوە بەرکەت وەرد خوەی تیارێد، و نزا و نماز و پشتگیری ئیوە ئەرا دەسمیەتی کوردستان و پێکهاتەیلی لە گشت رویەکان خوازیمن.
لەلای خوەییش، قەداسەت پاپا وت: فرە سوپاس لەی پێشوازیکردن گەرمە ک ئەرامان کردین، لە وەخت زوییگ خوازیم سەردان کوردستان بکەم، و خوەشحاڵم ک ئمڕوو مکس ئیوە وەجی هاوردم.
وتیش؛ گشت رێزیگ ئەرادان دیرم ک هەرچەن لەناو جەنگ بوین، باوەش کردینە ئاوارە مەسیحیەکان لە مووسڵ و هاوکاری نەینەوا و قەرەقۆش، و ئاوارەیل ئەو پێکهاتەکان وەباوەشەیل وازیگ.
قەداسەتی هەمیش وت: هاتمە تا وەیەکەو ئەرا ئیوە و ئەرا مەسیحیەکان و گشت مرۆیی نزا و نماز بخوەنیمن، وتیش؛ دوژمن ئەرا خراوکردن ئی وڵاتە هات، وەلی ئیوە وەباوگداری خوەدان خزمەت و پێشوازی لە ئاوارەکان و ئەو پێکهاتەیل کردین، و دیاری کرد ک جەنگ ویرانی و رماننە، باوجی ئیوە شکست وە دوژمن هاوردەین، و دووارە ئاوەدان وڵاتەگە کەین.
لەلاییگ تر لە باسەگەی، پاپای ڤاتیکان وت: هاتمە ئەرا پیرووزکردن ئی خاکە، و ئیوەیش ئەرا من نزا بکەن، سوپاس ئەرا ئەوەگ ئیوە ئەرا گشت ئاینەکان و پێکهاتەکان کەینەی، ئازادی باوە لە کوردستان، دووارە سوپاس ئیوە کەم لەی پێشوازیکردن گەرمە و ئەرا ئی میوانیکردنە.
