زیان خانەنشینەیل لە سلێمانی و گەرمیان
شەفەق نیوز/ هەرچەن حکومەت هەرێم کوردستان وەرجە جەژن نەوروز دەسکردە بەشەوکردن مووچەی فەرمانبەرەیل، باوجی نەۊین پۊل لە بانکەیل سلێمانی و گەرمیان، خانەنشینەیل خستە سەختی و مەینەتی و بەشیگیان رەسانە مردن.
حاجی موڕاد یەکیگ لە خانەنشینەیلە ئەرا ئاژانس شەفەق نیوز ئۊشێد: هووکارەی هاتن ئەرا بانک باخان لە شەفەق زۊ بۊنە، وەرجە رەسین کارمەنەیل بانکەگە، تا شۊنیگ ئەرا خوەیان گیر بارن ک بڕەسێدە پەنجەرەی بانکەگە تا مووچەی مانگ شوبات وەربگرن ک لە ٣٠٠ هەزار دینار زیاتر نییە.
حاجی موڕاد ئۊشیدیش: وەرجە پشوو نەوروز لە ساعەت سێەی شەفەق هاتیامنە ئیلا و مووچە نەگردیکن، و دۊای نەوروزیش هەر لە رووژ شەممەی گوزەشتە تا ئیسە گشت رووژیگ تیەیمنە ئی بانکە، و گشتمان پیرینن، تا وەڕزارەو بووسیەیمن، باوجی بیئومید بۊمن ک ئۊشن پۊل لەبانکەگە نییە.
وتیش: ئمڕوو رەسیمنە کۆتایی مانگ ئادار، و تا ئیسە مووچەی مانگ شوبات نەگردیمنە، و هەر رووژیگ خەرج هاتن و چگن کەیمن، وچشتیگ نییە ئی بار زیانە لە کووڵمان سووکەو بکەێد.
حاجی مەریەم خانیش، ئەرا ئاژانس شەفەق نیوز ئۊشێد: هاتنمان لەیرا ئەرا زیاتر لە ٦ ساعەت گشت رووژیگ، لەی کەشوهەوای سەرد و گەرمە و ئیمە هایمنە ئی تەمەنە، باریگ گەورە خەێدە بانمان، لەجیای ئەوەگ وەرجە زیاتر لە دوو هەفتە مووچەیلمان ئەرامان بڕەسێدە ماڵ، باوجی وەداخەو ک وەگەرد ئی مەینەتییشە وەدەسمان نەکەفت.
مەریەم خان داوا لە لایەنەیل حکومەتی کرد بنووڕنە گەورە تەمەنەیل و خانەنشینەیل و زیانیان کەمەو بکەن.
