گەرمیان.. چگارەیگ گیان دوو برا سینێد و دەسگیرکردن کەسیگ لە دوکان مۆبایل وە توومەت دزی
شەفەق نیوز/ پۆلیس گەرمیان خەوەردا لە کوشیان دوو کەس وە ئاگر تانکەریگ بویچگ، و دەسەڵاتەیل کەسیگ وە توومەت دزیکردن مۆبایل وپویل لەیەکێگ لە دوکانەیل بازرگانی لە کەلار دەسگیر کردن.
موقەدەم عەلی جەمال اەدوری وەرپرس پەیوەندی وراگەیانن پۆلیس گەرمیان ئەرا ئاژانس شەفەق نیوز وت: دوو برا لەداڵگبوی ١٩٩١ و ١٩٩٨ لەناو ئاگردگردن تانکەریگ ئەرا فرووشتن سوتەمەنی لەناوچەی رزگاری لە قەزای کەلار گیانیان لەدەسدان.
قەدوری دیاری کرد ک هەنای یەکیگ لە برایل چگارەیگ داگرسان ئاگر لەناو تانکەرەگە هیز گرد، ک بویە تەقیان تانکەر سوتەمەنیەگە، و هەردوگیان وەکوتپڕ گیانیان لەدەسدان.
لە رویداویگتر، قەدوری دەسگیرکردن گەنجیگ راگەیان کار لەناو دوکانیگ مۆبایل کەێد، وە توومەت دزیکردن لە قەزای کەلار.
دیاری کرد ک توومەتبارەگە لەلای خاوەن دوکانیگ مۆبایل کار کەێد، و کەسیگ مۆبایلەگەی وبڕیگ پویل گوم کردیە، لەلای خاوەن دوکانەگە داد لەدەس ئەو شاگردە کرد، و توومەتبارەگە دەسگیر کریا، وئاشکرای دزیکردن ١٥ مەلیۆن دینار عراقی و١٦ هەزار دۆلار و تفەنگیگ وچەن مۆبایل وئایپادیگ کرد.
وتیش: توومەتبارەگە ئاشکر کرد ک یە ٣ ساڵە دزی کەێد، و کەسیگ تر دەسمیەتی دەێد، وئەو کەسیشە دەسگیر کریا.
