پەرلەمان عراق دەسەیگ دروس کەێد ئەرا وەشوینکەفتن شایستەیل هەرێم کوردستان.. بەڵگەنامە
شەفەق نیوز/ دەسەی دارایی لە پەرلەمان عراق، بڕیار دروسکردن دەسەیگ تایبەت دا ئەرا وەشوینکەفتن شایستەیل دارایی هەرێم کوردستان ئەرا ساڵەیل 2024 و2025.
وەگورەی کتاویگ وە واژوو سەرۆک دەسەی دارایی پەرلەمان عەتوان عەتوانی اە رووژ 11ی کانوون دویەم، بڕیار دریا دەسەیگ لقی دروس بکریەێد وە سەرۆکایەتی "ئەحمەد مزهر جبوری" جیگر یەمەن سەرۆک دەسەی دارایی.
دەسەگە شەش ئەندام دیرێد، هەرلە: عودەی عەواد کازم، نەرمین مەعروف غەفور، مستەفا خەلیل گەرعاوی، فەیسەڵ حەسان سکر نایلی، جەمال ئەحمەد محمد کۆچەر، و سەمیر موبارەک میرزا (بڕیاردەر دەسەی دارایی).
دروسکردن ئی دەسە وەگەرد داواکارس حکومەت هەرێم کوردستان و وەزیر و نوێنەرەیل هەرێم کوردستان لە بەغداد تیەێد، کە دویەکە شەممە داوا لە حکومەت فیدراڵی کردن گەرەنتی مووچەی فەرمانبەرەیل و کارمەنەیل کەرت گشتی لە هەرێم ئەرا ئی ساڵە بەێد وە تەواوی وەبی کەمی.
ئەوەیش لە کۆنگرەیگ رووژنامەوانی وەلایەن پێشەوا هەورامی هات لە هەولێر دویای تەواوبوین گردەوبوینیگ نائاسایی لەلایەن حکومەت هەرێم کوردستان وەرد نوێنەرەیل هەرێم کوردستان لە بەغدا لەبان باوەت مووچەی فەرمانبەرەیل.
هەورامی لەناو کۆنگرەگە وت: گردەوبویەیل داوا لە حکومەت فیدراڵی کردن بەش هەرێم کوردستان لە بودجەی دارایی ئمساڵ مل بکەن، نەک تەنیا مووچەی مانگانە.
وتیش: تا ئیسە کەمتر لە 7 لەسەد لە بەش شایستەیل دارایی هەرێم کلکریاس، وتیش؛ حکومەت فیدراڵی مووچەی کوردستان هن مانگ کانون یەکەم لە ساڵ 2024 کلنەکردیە هەرچەن پەیمان وەپی داگە.
