گردەوبوین پارتی و یەکێتی رەسێە رێککەفتن لەبان چەن خاڵیگ
شەفەق نیوز/ هەردوگ نویسینگەی سیاسی پارتی و یەکێتی، ئمڕوو چوارشەممە، کۆتایی وە گردەوبوینیگ لە سەرۆکایەتی هەرێم کوردستان لە هەولێر پایتەخت هاوردن.
بەیاننامیگ هاوبەش لەلایەن هەردوگ نویسینگەی سیاسی وت: لە گردەوبوینەگە وە شیوەیگ ئاشکرا باس پەیوەندیەیل ناوبەین هەردوگ لایەنەگە کریا، ورەوشەیل ئیسە لەعراق و هەرێم کوردستان، وپەیاکردن زەمینەیگ گونجیاگ ئەرا هاوکاری وکار هاوبەشی.
بەیاننامەگە وتیش: هەردوگ لایەنەگە دووپات کردن ک دویای هەڵمەتەگەی سەرۆک هەرێم ئەرا زەمینەیگ ئەرا گفتوگۆکردن وگونجانن وگەشەپیدان پەیوەندیەیل ناوبەین هەردوگ لایەنەگە پەیا بوی، وکار ئەرا گلەوداین بڕوایی ناوبەین هەردوگ حزبەگە، وهاوکاری ناوبەین لایەنەیل سیاسی لەڕی لەیەکڕەسینەوە و گفتوگۆ.
هەردوگ لایەنەگە ڕێک کەفتن لەبان وەردەوامی گردەوبوینەیل هاوبەش ناوبەین هەردوگ حزبەگە، جویر بنەمایگ ئەرا کار هاوبەش، وەگەرد دروسکردن دەسەیگ هاوبەش ناوبەین هەردوگ حزبەگە، ئەرا دانوسەنین دەربارەی هەڵبژاردن هاتگ پەرلەمان کوردستان.
لەلاییگتر لە گردەوبوینەگە، دووپات کردن لە پاڵپشتیکردن هەردوگ لایەنەگە ئەرا حکومەت هەرێم کوردستان، ودامەزراوەیل شەرعی، و وەردەوامی لە قەیەغەکردن هەڵمەت راگەیانن لەبان یەکتر.
