ئەرا سێیەم رووژ پشتەڵپشت..  ئیران تووپواران باکوور هەولێر کەێد

شەفەق نيوز/ تووپەیل ئیرانی، ئمڕوو شەممە، دووارە تووپواران ناحیەی سیدەکان لە باکوور شار هەولێر پایتەخت هەرێم کوردستان کردن، وەدەسپیچگ هەسی حزبەیل ئۆپۆزسیۆن دژوە ڕژیمەگە لە تەهران.

ئیحسان چەلەبی وەڕیەوبەر ناحیەگە ئەرا ئاژانس شەفەق نیوز وت:ئاوای بەرزین سەروە ناحیەگە، شەوەکی ئمڕوو، دوو جار کەفتە وەر تووپواران ئیران.

لەلای خوەییش، دامەزراو فەرماندەی هێزەیل پێشمەرگەی کوردستان سەروە پارتی دیموکراتی کوردستان ک ئۆپۆزسیۆن ڕژیم تەهرانە باس دەسکردن وە تووپواران کۊەیل هەرێم کوردستان کرد لەلایەن سوپای پاسداران ئیران، و هەمیش باس خستن فڕۆکەیگ بێفڕۆکەوان ئیرانی بومبکریاگ کرد.

دامەزراوەگە لە بەیاننامەیگ ئمڕوو وت: لە ئیوارەی جمعە، تووپواران ئیران دووارە نووە بۊی وەتایبەت لەبان ئاوای بەرزین و بیجگە تووپوارانەگە، گورزەیلیگ وە فڕۆکەیل بێفڕۆکەوان بۊی.

وتیش؛ هەنای یەکی لە بێفڕۆکەوانەیلە لە ئاسمان ناوچەگە بۊی، هێزەگمان خستنەی خوار.