ئەرا سێیەم رووژە ئاگر بمباران تورکیا چوار ئاوای سزنێد
2021-09-04T14:48:14+00:00
شەفەق نیوز/ سەرچەوەیگ ئەمنی لە دهۆک، ئمڕوو شەممە، خەوەردا لە وەردەوامی سزیان دارستانەیل و کاتەیل چوار ئاوای لە ناوچەی بەرکاری لە قەزای عمادیە لەوەر بمباران تورکیا، ئەوەیش ئەرا سێیەم رووژە لەپشت یەک.
سەرچەوەگە ئەرا ئاژانس شەفەق نیوز وت: ئاگر لە لەوەڕەیل ئاوای کیزی و ساردی و بیێ و ردێنی لە سێ ڕووژ گوزەیشتە وەردەوامە لەوەر بمباران تورکیا لەبان ناوچەیل بەرکاری لە سنوور قەزای عمادیە.
سەرچەوەگە نشان دا ک فڕۆکەیل تورکیا، شەوەکی ئمڕوو، دوو جار لە پشت یەک مباران ئاوای کیزی کرد تا دووارە ئاگرەیلە فراوانەوە بوون، و دیاری کرد ک لایەنە پەیوەندیدارەکان توانای کپەوکردنی نەیاشتن لەوە سەختی ناوچە کوێەیلە و لەوەر جەنگ ناوبەین تورکیا و پەکەکە لەو ناوچەیلە.
