رێبەر ئەحمەد: بەغداد نیەتۊنێد مقیەتییمان بکەێد و پەیوەندی وەردیان کەیمن ئەرا داین سیستەمەیل وەرگری ئاسمانی وەپیمان
شەفەق نیوز- هەولێر
رێبەر ئەحمەد، وەزیر ناوخۆی هەرێم کوردستان، ئمڕوو سێشەممە، دووپات یەکلاییکردن ناکۆکییەیل پەیوەندیدار وە جیوەجیکردن سیستەم "ئەسیکۆدا" لە دەروازە سنوورییەیل کرد، لە وەختیگ باس پەیوەندیکردن هەرێم وەرد سەرۆکایەتی ئەرکان سوپای عراقی لەباوەت وەرگردن سیستەمەیل وەرگری ئاسمانی ئەرا مقیەتیکردن کێڵگە و دامەزراوەیل کرد.
ئەحمەد، وتاریگ کە لە نمایشکردنیگ پیشکەشی کرد کە فەرماندەیی هیزەیل زێرەڤانی لەباوەت ئەنفال بارزانییەیل سازی کردۊد، و ئاژانس شەفەق نیوز ئامادەی بۊ، وت، کە دۆسیەی ئەسیکۆدا وە شیوازیگ فراوان باس کریا، و سەرۆک حکومەت هەرێم وە شیوازیگ کەسی وەدۊاچگن ئەرا باوەتەگە کرد، و دیاری کرد کە هەردوگ لایەنەگە وەرجە چەن رووژیگ رێک کەفتن لەبان کلکردن دۆسیەگە ئەرا ئەنجومەن وەزیرەیل فیدراڵی.
دیاری کرد کە تەنیا خاڵیگ کە شوین باس بۊ پەیوەندی داشت وە بەشەوکردن داهاتەیل دەروازە سنوورییەیلەو، و دووپات کرد کە بایەسە بەشەوکردنەگە وە نیمەیی بوود لە ناوەین هەردوگ لایەنەگە وەپای یاسا، و دیاریی کەێد کە ئی دۆسیە یەکلا کریاسەو و دی هیچ کێشەیگ نەمەنیە کە ریگری بکەێد لە جیوەجیکردن سیستەم ئەسیکۆدا.
وتیش کە جیوەجیکردن سیستەمەگە "چوودە خزمەت بەرژەوەنی حکومەت فیدراڵی و حکومەت هەرێم وە یەک ئاست".
لەباوەت قەرەبووکردن زەرەدمەنەیل لەو پەلامارەیلە کە هەرێم کوردستان تۊشیان هات، ئەحمەد وت کە هەرێم راپۆرتیگ هۊرد ئامادە کردگە، لە وەختیگ لایەنە پەیوەندیدارەیل گشت زەرەدەیل توومار کردنە و بەرزیان کردنە ئەرا حکومەت فیدراڵی، و دووپات کرد: "تا ئیسە هیچ گامیگ کردەیی نەیمنە".
لەباوەت سیستەمەیل وەرگری ئاسمانی، وەزیر ناوخۆ ئاشکرا کرد، کە حکومەت هەرێم لە پەیوەندی وەرد سەرۆکایەتی ئەرکان سوپای عراقییە لەی دۆسیە، و دیاری کرد کە حکومەت فیدراڵی پەیمان داگە وە پەسەنکردن وەرگردن ئی سیستەمەیلە لەلایەن هەرێمەو.
هەمیش وت: حکومەت فیدراڵی "نیەتۊنێد مقیەتییمان بکەێد"، و دووپات لە بۊین پەیمانیگ کرد وە هاوکاری لەی دۆسیە، وەگەرد دروسکردن ژووریگ ئۆپراسیۆنەیل هاوبەش ئەرا وەڕێوەبردن سیستەمەیل وەرگری ئاسمانی.
هەمیش ئەحمەد باس لە هەڵمەت ئەنفال کرد، و وت کە "ئەنفال بۊسە بەڵگەیگ لەبان ئەوەگ ئی زەخمە ژیان هاوبەشە"، و دووپات کرد کە ئی رۊداوە "ئەرا هەمیشە لە ویژدان گەلەگەمان مینێدەو".
