دووارەی تووپواران ئیرانی لەبان سیدەکان لەباکوور هەولێر

شەفەق نیوز/ تووپ سوپای ئیرانی، شەوەکی ئمڕوو یەکشەممە، دووارە تووپواران ناحیەی سیدەکان لە ئیدارەی ناوچەی سەروەخوەیی سۆران لە باکوور شار هەولێر پایتەخت هەرێم کوردستان کرد.

ئیحسان چەلەبی وەڕیەوبەر ناحیەگە ئەرا ئاژانس شەفەق نیوز وت: تووپوارانەگە لەبان خود ئەو ئاوایە کریا ک دویەکە شەممە کەفتە وەر تووپ، باوجی ئیجارە نزیک ماڵەیل بوی.

وتیش: تا ئیسە هویچ زەرەردیگ گیانی لەلی نەکەفتیە.

دویەکە شەممە، وەڕیەوبەر ناحیەگە ئەرا ئاژانسمان وت: گورز تووپ ئیرانی پەلامار ناوچەی بریزین وهۆرنی لە سیدەکان دا، و زەرەد گیانی لەلی نەکەفت.

دویەکەیش سوپای پاسدران ئیران، خوەی کردە خاوەن ئەو گورزەیلە لەبان شوینەیلیگ لە ناوچەی سەروەخوەیی سۆران لە هەرێم کوردستان.