دویاترین ئامار لەلایەن تەندروسی هەرێم کوردستان لە پەلامارەگەی تورکیا وەبان زاخۆ
شەفەق نیوز/ سامان بەرزنجی وەزیر تەندروسی لە حکومەت هەرێم کوردستان، ئمڕوو چوارشەممە، دویاترین ئامار قوربانیەیل تووپواران تورکیا لەبان یەکیگ لە ناوچەیل گەشتوگوزاری لە ئیدارەی زاخۆ ئاشکرا کرد، و لە ئامادەباشی تەندروسی دهۆک و هەولێر ئەرا دەسمیەتی زەخمدارەیل راگەیان.
بەرزنجی لە بەیاننامیگ رەسیە ئاژانس شەفەق نیوز وت: ئامادەبوینی وەگەرد سەرپەرشتیار ئیدارەی تەندروسی زاخۆ راگەیان ئەرا چارەکردن زەخمدارەیل، ودیاری کرد ک ئەرکدار وەڕێەوبەرایەتی تەندروسی هەولێر و دهۆک کرد تا گشت پاڵپشتییگ ئەرا چارەکردن زەخمدارەیل پێشکەش بکەن، وئامادە ئەرا هەر خوازینیگ پزشکی و ماشینەیل فریاکەفتن و پزشکەیل پسپۆڕ بوون.
بەرزنجی وتیش: وەداخەو ک هەیشت لە گەشتیارەیل وەرجە رەسینیان وە خەسخانە گیانیان لەدەسدان، وگشتیان گەنج و مناڵ بوین، ومناڵیگ لەناویان تەنیا یەک ساڵ تەمەنی بوی، وەگەرد چوار دویەت وچوار کوڕ.
وتیش: پیشوازی لە ٢٦ زەخمدار کریا، سێیان لەلیان لەوەر سەختی زەخمدارییان لە سەر ومەغز ئەرا دهۆک کلکریان، وتیش؛ شەش زەخمدار کەفتنە ژیر نەشتەرگەری.
لەلای خوەییش، دڵشێر عەبدولسەتار وەڕیەوبەر ناحیەی دەرکار لە زاخۆ ئەرا ئاژانس شەفەق نیوز وت: دویاترین ئامار قوربانیەیل تووپواران تورکیا لەبان سەیرانگای بەرخ رەسیە ٩ کوشیان و ٢٢ زەخمدار.
عەبدولستار وتیش: دەسەیگ لە هیزەیل پاسەوان سنووری عراق رەسیە شوین رویداوەگە ئەرا لێکۆڵینەوە، وتیش: شاندیگتر ئەوەسا وەینزیکە رەسێدە زاخۆ.
