دهۆک.. سڕین کڕ و نویسینەیل گەشتیارەیل لەبان دەر ئاسەواری بادینان (وینە)
شەفەق نیوز ـ بادینان
فەرمانگەی ئاسەوار و میرات لە دهۆک، ئمڕوو سێشەممە، لاوردن نویسین و دەربڕینەیل راگەیان کە شمارەیگ لە گەشتیار و سەردانکەرەیل وەبان بەشیگ لە دەر ئاسەواری بادینان لە شار ئامێدی باکوور پارێزگاگە نویسانەسێ وە وەکارهاوردن مادەیل تایوەت لەژیر سەرپەرشتی کەسەیل پسپۆر لە فەرمانگەگە.
وەڕێوەبەر فەرمانگەگە، بێکەس بریفکانی وە ئاژانس شەفەق نیوز وت، فەرمانگەگە هەڵسیاس وە سڕین و لاردن نویسینەیل کە شمارەیگ لە گەشتیارەیل وەبان دەرەگە وەجیهیشتنە ئەرا پاراستن بەها مێژوویی و رەنگینیەگەی.
دەر بادینان وە یەکیگ لە شوینەوارەیل ئاسەواری و مێژوویی گرنگ دانرێد لە شار ئامێدی و بەهای مێژوویی گەپیگ هەڵگرێد کە نوینەرایەتی بەشیگ لە میرات ناوچەگە و مێژوو شارستانیەت چەن سەدەیگ کەێد لە ناوچەگە، وەپای بریفکانی.
وەڕێوەبەر ئیدارەگە داوا لە گشت سەردانکەر و و گەشتیارەیل کرد رێز لە شوینەیل ئاسەواری بگرن وە نەنویسانن ناو و دەربڕین وەبانیان و هەر رەفتاریگ زەرەد وەپیان بڕەسنێد، دووپاتکرد یادگاری کرێد لەری وینەگردن بوود وەبی شیوانن ئاسەوارەگە.
ئاشکرایکرد، دەر بادینان کامیرای چەودێری ئەرای دانریاس، و فەرمانگەی ئاسەوار رێکار یاسایی وەرانوەر هەر کەسیگ وەرگرێد کە نویسین یا زەرد وە شوینەگە بڕەسنێد.
لە کۆتایی وتیش، پاراستن شوینەیل ئاسەواری وەرپرسیارەتی هاوبەشیگە، هەوەجەکەێد هاوڵاتی و گەشتیارەیل هاوکاربوون وەرد لایەنە پەیوەنیدارەیل ئەرا پاراستن دەر بادینان و شوینە مێژوویەیل ترەک لە پارێزگای دهۆک تا مێژووی ناوچەگە ئەرا نەوەیل ئایندە بمینێد.
