دارايى کوردستان دەسکەێدە بەشەوکردن مووچە و ئویشێد: بەغداد وە یاسای بودجە و رێککەفتن پابەند نەویە
وەزارەتەگە لە بەیاننامەیگ رەسیە ئاژانس شەفەق نیوز وت: ئمڕوو پەنجشەممە، لە ساعەت ٩:٣٠ شەوەکی، بانک ناوەندی عراق لق هەولێر ٥٩٨ ملیار دینار دادە وەزارەت دارایی و هەواڵەی بانکەیل کریا، و ئمڕوو دەسوە بەشەوکردن مووچەی وەزارەت تەندروسی و راگەیانن خشتەی مووچەی گشت وەزارەتەیل کریەێد و کەمییەگە پڕەو کریەێد.
بەیاننامەگە وتیش؛ حکومەت هەرێم کوردستان مانگانە زیاتر لە ٩٤٠ ملیار دینار تەنیا ئەرا بەشەوکردن مووچە خوازێد، بیجگە خەرجەیل وەکارخستن و بودجەی بەرهەم و خەرجەیل کارەبا.
بەیاننامەگە وتیش؛ حکومەت فیدڕاڵی و وەزارەت دارایی عراق پابەند وە هویچ شیوەیگ لە رێککەفتن ناوبەین حکومەت هەرێم کوردستان و بەغدا نەویە، و یاسای بودجەی فیدڕاڵی جیوەجی نەکردیە، و دیاری کرد ک شایستەیل هەرێم کوردستان وەگورەی یاسای بودجە مانگانە رەسێدە یەک تریلیۆن و ٣٨٤ ملیار دینار تەنیا ئەرا مووچە و خانەنشینەیل و ٩٠٦ ملیار دینار ئەرا هیزەیل پیشمەرگە.
بەیاننامەگە لە کۆتایی وتیش؛ وەگورەی ئەو رێککەفتنە ک لەی مەوقە حکومەت فیدڕاڵی جیوەجیی کەێد لە بنەمای بڕ خەرجەیل مانگانە، بایەت بوی یەک تریلیۆن و ١٧٤ ملیار دینار کل بکردیاد، و ئەو بڕە پویلە ک کلی کردیە یاسای بودجە و گشت رێککەفتنەیل ناوەین هەردوگ لایەنەگە شکنێد.
