دەسوەپيکردن پێشانگەی "Next Step" ئەرا رينیشاندان دەرچگەیل ئامادەیی لە سلێمانی
شەفەق نیوز ـ سلێمانی
ئمروو شەممە، لە شار سلێمانی، کاروچالاکیەیل پێشانگەی Next Step دەسوە پێ کرد، تایبەت کریاگە ئەرا رێنیشاندان دەرچگەیل پۆل دوانزدە و دەسمیەتی دانیان لە پرکردن فۆڕم "زانکۆلاین"، و ناسین ئەو دەرپەڕەیلە کە ها وەرچەویا ئەرا چگنیان ئەرا زانکۆ و پەیمانگەیەیل، وە بەشداریکردن نۊنەرەیل زیاتر لە 30 زانکۆ و پەیمانگە.
یاریدەدەر سەرپەرشتیار لە یەکێتی خوەنەوارەیل کوردستان، شنیار سلام، ئەرا ئاژانس شەفەق نیوز وت: "پێشانگەگە ئمروو لە کارگەی فەرهەنگ لە شار سلێمانی دەسوە پێ کرد، و تا سێ رووژ وەردەوام بوود، لە شان ئەوەگ کاروچالاکیەیلی لەدویای ئەوە بگوێزرێدەو ئەرا ناوچەیل ترەک ئەرا وەدەسهاوردن ئامانج خوەی".
دیاریکرد "نۊنەرەیل لە زیاتر لە 30 زانکۆ و پەیمانگە بەشداری کەن لە پێشانگەی Next Step، کە ئیە ری دەێد وە خوەنەوارەیل تا وە شێوەیگ ڕاسەوڕاس راوێژکاری و زانیاریەیل پەیوەنیدار وە هەڵبژاردن زانکۆ و پەیمانگە و بوارەیل پوڕیاگ رەسێدە دەسیان لە وەخت پرکردن فۆڕم زانکۆلاین".
سلام دیاری کرد، پێشانگەگە هەمیش 400 سەکۆڵارشپ (دەرفەت خوەنین) لە زانکۆ و پەیمانگە تایبەتەیل دابین کەێد، کە تایبەت کریانە ئەرا ئەو خوەنەوارەیلە کە خوازیارن وە بێبەرامبەر وەدویاچگن ئەرا خوەنینیان بکەن، لە شان پێشکەشکردن رێنیشاندان هەوەجەکریاگ ئەرا دەرچگەیل قۆناغ ئامادەیی لەبان خوەنینیان.
