دۊای مشتومڕ لێدوانەیل.. یەکێتی نیشتمانی هەڵوێست خوەی لە خانەقین ئاشکرا کەێد و دووپات لە رەتکردن جیاوازی کەێد

شەفەق نیوز- دیالە

ئەندام ئەنجومەن پارێزگای دیالە و نۊنەر فراکسیۆن یەکێتی نیشتمانی کوردستان، ئەوس مەهداوی، رووژ چوارشەممە، دووپات کرد کە لێدوانەیل دۊایی وەرپرس مەڵبەند پارتەگە لە خانەقین، کاروان یاروەیس، وە شیوەیگ ناڕاس فامیاس، دووپات کرد لەبان پابەندبۊن پارتەگە وە یەکپارچەیی عراق و رەتکردن جیاوازی لەناوەین پێکهاتەیل قەزاگە.

مەهداوی، لە کۆنگرەیگ رووژنامەوانی کە پەیامنێر ئاژانس شەفەق نیوز ئامادەی بۊ، وت کە "عراق وڵاتیگ یەکگرتگە، هیچ چشتیگ رووڵەیلی جیاوە نیەکەێد، دەستوور عراقی سیستەم فیدراڵی چەسپانگە، هەرلیوا مادەی 140 مادەیگ دەستوورییە و لیژنەیگ جیوەجیکردن دریەێد کە هادی عامری سەرۆکایەتیی کەێد، رێنماییەیل پابەندکەر لەلی دەرچوود ئەرا رەفتارکردن وەگەرد ئەو ناوچەیلە کە گرێدە خوەی چۊ رەوشیگ تایبەت".

زیاتر وت کە "ئی ناوچەیلە کورد و عەرەب و تورکمان لەخوەیان گرن، گشتیان بران، و خانەقین بەشیگە لە یەکپارچەیی عراق و پارێزگای دیالە"، دیاری کرد کە "قایمقام قەزاگە بەشیگە لە سیستم کارگێڕی سەروە حکومەت ناوخوەیی".

مەهداوی توومەتبار "پەڕەیەیل ساختە و کراگردە کرد وە تەقەلاکردن ئەرا خەسەوکردن رۊیداوەیل دۊایی ئەرا نایین ئاژاوە"، وتیش کە "دۆسیەی خانەقین ناسکە وە مدوو بۊن ئاوارەیل لە سەردەم رژیم وەرین، بیجگە لە بڕیارەیل حکومی کە دەق لەبان گلەوداین دانیشتگەیل رەسەن کەن، رێنماییەیلیگ کە کلکردن فۆرم خوەراک و رێکارە کارگێڕییەیل لەناوەین ئەو ناوچەیلە کە مادەی 140 گرێدە خوەی و کارەیلیگ ترەک  رێک خەێد".

مەهداوی وەردەوام بۊ، وت: "داوای وەخشین کردیمن لەباوەت لێدوان دۊایی وەرپرس پارتەگە دۊای ئەوەگ وە شیوەیگ ناڕاس فامیا، ئیمە رازی وەو لێدوانەیلە نییمن کە دەسدریژی کەنە بان هەر پێکهاتەیگ"، دیاری کرد کە "قسەگە تەنیا لەبان ئەو کەسەیلە بەی کە هاتنەسە خانەقین وە پیچەوانەی رێنماییەیل مادەی 140، نەک وە جۊریگ بفامیەێد کە پێکهاتەیگ دیاریکریاگ کەێدە ئامانج".

دیاری کرد کە "مامەڵەیل تایبەت وە خانەقین پیشکەش وە قایمقامیەت کریەێد، کە خوەی فەرمانگە ئەرا پەیوەندیدارەیلی کل کەێد ئەرا دەرکردن بڕیار لەباوەت پەسەنکردنی یا رەتکردنی وەپای یاسا".

لەلای خوەیەو، قایمقام خانەقین، جەواد فەیزولڵا، اە کۆنگرەیگ رووژنامەوانی کە پەیامنێر ئاژانس شەفەق نیوز ئامادەی بۊ، وت کە "ئەنجومەن پارێزگاگە میوانداریی کردگە ئەرا گفتوگۆکردن و ئاشکراکردن شمارەیگ لەو دۆسیەیلە کە گریەدارن وە قەزاگە".

فەیزولڵا هەمیش وت: "ئیمە فەرمانبەرەیل حکومین و تەنیا یاسا جیوەجی کەیمن"، دووپات کرد کە "رەوشەیل لە خانەقین جیگیرن، ئەو کەسەیلە کە گیریاینە ئازاد کریانە، لە ئیسە هیچ دەسگیرکردن یا یاداشتەیل گردن لەبان چالاکەوانەیل یا گەنجەیل یا کەسایەتییەیل سیاسی نییە".

لێدوانەیل سەرکردەیل لە یەکێتی نیشتمانی کوردستان لەباوەت ئاڵشتکارییە دیمۆگرافییەیل کە ناوچەگە دۊای رۊیداوەیل 16 تشرین یەکەم/ئۆکتۆبەر 2017 وەخوەی دی، داواکردن ئەرا تەواوکردن رێکارەیل جیوەجیکردن مادەی 140 لە دەستوور عراقی، دۆسیەگە لە نووەو ئەرا ناو گفتوگۆیەیل گلەو دا.

ئی لێدوانەیلە کاردانەوەیل جیاوازیگ لە خانەقین و دەورگردی دروس کردن، وەرجە ئەوەگ بازنەی مشتومڕەگە فراوانەو بوود و سیاسەتمەدارەیل و دەمچەرمگەیل و ناوەندە جەماوەرییەیل بچنە ناوی، تا رەسیە داواکردن ئەرا رێکخستن گردەوبوینیگ جەماوەری لە قەزاگە، وەرجە وسانن گردەوبوینەگە و چگن وە دۆسیەگە وەرەو بەغداد ئەرا باسکردن شوینەوارەیلی.

وەپای وەدۊاکەفتنەیل کە ئاژانس شەفەق نیوز ئەنجامیان داگە، رووژەیل دۊایی بەرزەوبۊنیگ لە وتار سیاسی و جەماوەری لەبان ناسنامەی خانەقین و دۆسیەی ناوچە کێشەلەسەرەیل وەخوەیان دین، لە ناو هەڵوێستەیل جیاوازیگ لەلایەن کەسایەتییەیل و ناوەندەیل لە ناوچەیل هاوسای قەزاگە؛ کە بەشیگ لە لایەنەیل ناڕەزایەتی دانە بان ئەو باسەیلە کە گریەدارن وە "تەعریب" و جیوەجیکردن مادەی 140، لە وەختیگ دەنگەیل تر داوا لە چەوخشانن وە بنەمای دەستووری مادەگە و گردنەوەر رێکارەیل یاسایی وەرانوەر ئەو لایەنەیلە کردن کە هەڵوێستەیلیگ پەیاڕەو کەن کە دوینن پێچەوانەی یاساس.