تا یەک هەفتە وەردەوامە.. سلێمانی ئاهەنگ ٢٣٨مین ساڵیاد دامەزراننی کەێد.. وینە
شەفەق نیوز/ لە شار سلێمانی لە هەرێم کوردستان، ئمڕوو دووشەممە، چالاکیەیل هەمەڕەنگی لە فرەی دامودەزگایل دەوڵەت لە پارێزگاگە وەڕیەو چگ، وە ٢٣٨مین ساڵیاد دامەزرانن شارەگە.
پەیامنێر ئاژانس شەفەق نيوز لە سلێمانی وت: گشت مەکتەوەیل لە پارێزگاگە ئاهەنگەیل کلتووری و هونەری لە یەکەم ساعەتەیل دەوام فەرمی ئەنجام دان.
پەیامنێر ئاژانسمان وتیش: ئالان حەمە سەعید وەزیر پەروەردە لە حکومەت هەرێم کوردستان ئامادەی ئەو چالاکیەلیە لەناو یەکیگ لە مەکتەوەیل پارێزگاگە بوی.
گشت خوەنەوارەیل و مامووستایل وکادرەیل پەروەردە دڵنگ کوردی پووشین.
پەیامنێرمان وتیش: سەرۆکایەتی شارەوانی پارێزگای سلێمانی ڕێز لە ٢٣٨ فەرمانبەر لە جویراوجور پلەیل فەرمانبەری وەی بوونە نا.
فەرمانگەی تەندروسی پارێزگای سلێمانی، ئەوەیش وە ئامادەبوین پارێزگار سلێمانی ئاهەنگ وەهاووەختی وەگەرد رووژ جەهانی بیمارەیل شەکرە کرد، و ڕێز لە کادرەیل تەندروسی سلێمانی نان.
ئیدارەی قایمقامیەت سلێمانی ئاهەنگیگ هونەری لە ناوچەی کلتووری سەرای لەناوڕاس سلێمانی کرد، و وەگورەی قسەی پەیامنێر ئاژانسمان ئاهەنگەگە پێشانگایگ ئەرا کارەیل دەسڕەنگینی و فلکلۆری و خوەراک جەماوەری کریا، وەگەرد نمایشکردن تابلۆیل شیوەکاری وەگەرد نمایشکردن شیوەیل دڵنگ کوردی.
لە فەرمانگەی بەشەوکردن کارەبای سلێمانی، فەرمانبەرەیل گوڵ وە خوەشی رووژەگە بەشەو کردن، وەگەرد پووشین دڵنگ کوردی لەلایەن گشت فەرمانبەرەیل.
وەڕیەوبەرایەتی گشتی روشنهویری و هونەرەیل سلێمانی، ئامادەکاری ئەرا ئاهەنگیگ ئیوارەی ئمڕوو وە خوەشی ئی رووژە کەێد.
بڕیارە ئاهەنگەیل رووژ سلێمانی ئەرا ماوەی یەک هەفتە وەتەواوی وەردەوام بوود، ک لە ئمڕوو دووشەممە ١٤ی تەشرین دویەم دەسوەپی کەێد.
شار سلێمانی، وەرجە ٢٣٨ ساڵ، لە ١٤ تەشرین دویەم ساڵ ١٧٨٤ لەلایەن ئیبراهیم پاشا لە بابان دامەزریا، و وەناو سلێمان پاشای بابان ناوی نریا.
