تەقیان وەجیماگەیل جەنگی کۆتایی وە ژیان دوو کەس هاورد لە هەڵەبجە
شەفەق نیوز ـ هەڵەبجە
سەرچەوەیل لە پۆلیس و تەندروسی، ئمڕوو دووشەممە، خەوەردان لە مردن دوو کەس و زەخمداری کەسەیلتر وە تەقیانگولە تووپ کویەنەیگ لە وەجیماگەیل جەنگ، لە نزیک ئاوای "کانی ماران" لە سنوور پارێزگای هەڵەبجە، و دەزگا ئەمنیەیل لێکۆڵینەوە لە چۆنیەتی رویداوەگە وازکردنە.
قسەکەر پۆلیس هەڵەبجە، ئاکام قوتبەدین، لە بەیاننامەیگ وت: "تەقینەوەیگ قایم لە ساعەت 12:15ی نیوەڕووی ئمڕوو، لە ناو ئەشکەفتیگ لە نزیک ئاوای کانی ماران رووی دا، وە مدوو دەسکاریکردن گولە توپ کوەنیگ لە وەجیماگەیل جەنگی".
وتیش: "هاز تەقینەوەگە بویە مدوو رمیان قەواسەی ئەشکەفتەگە وەبان دووکەس لە لەداڵگبویەیل ساڵەیل 1984 و 1990، و کە دەسوەجی گیان لەدەسدان"، و دیاریکرد، هێزەیل ئەمنی چگنەس شوین رویداوەگە، تەرم دوو قوربانیەگە کلکریا ئەرا پزیشک دادوەری و لێکۆڵینەوە ئەرا زانین هویردەکاری و بارودۆخ رویداوەگە وەردەوامە.
وەپای زانیاریە سەرەتاییەیل، دوو قوربانیەگە "سەرەهنگ کەبیر" و "نەوزاد مەعروف" بوین، کە وە مدو تەقینەوە و رمیان لە شوین رویداوەگە لە هەمان وەخت گیان لەدەسدان.
لە لایگتر، فەرەحان حەمەخان، قسەکەر وەڕێوەبەرایەتی گشتی تەندروسی هەڵەبجە، وە ئاژانس شەفەق نیوز وت: "شمارەی پشتڕاستکریاگ تا ئیسە دوو کەس گیان لەدەسدان، وەگەرد توومارکردن چەن زەخمداریگ باوجی تا ئیسە شمارەی کۆتایی و هویرد زەخمدارەیل وەردەس نییە".
