بارزانی لە یاد ئەنفال بادینان: داواکاریمان ئەرا قەرەبووکردن قوربانییەیل و ناودەوڵەتیکردن تاوانەگە چۊ جینۆساید نووەو کەیمن
شەفەق نیوز - هەولێر
نێچیرڤان بارزانی، سەرۆک هەرێم کوردستان، ئمڕوو سێشەممە، دووپات لەبان وەردەوامبۊن لە تەقەلا ناودەوڵەتییەیل کرد ئەرا ناسانن ئۆپراسیۆنەیل "ئەنفال بادینان" چۊ تاوانیگ جینۆساید، وە نووەوکردن داواکاری لە حکومەت فیدراڵی ئەرا قەرەبووکردن گشت قوربانییەیل رژیم وەرین لەڕۊ دارایی و مەعنەوییەو.
سەرۆک نێچیرڤان بارزانی لە بەیاننامەیگ کە رەسیە ئاژانس شەفەق نیوز، وەی بونەی یاد 38ەم تاوانەگە کە لە ماوەی 25 ئاب تا 6 ئەیلوول 1988 رۊ دا، وت کە ئی ئۆپراسیۆنەیلە "نوێنەرایەتی قۆناغ دۊایی لە هەڵمەتەیل ئەنفال کردن کە رژیم وەرین دژ وە مەدەنییەیل و ئاو و هەوا و ژینگەی بادینان وە چەکە قەیەغەکریاگەیل ئەنجامی دا"، وە یادهاوردن گشت قوربانییەیل وە رێز و گەورەییەو.
سەرۆک هەرێم کوردستان هەمیش وت، کە "دادگای تاوانەیل باڵای عراقی بڕیار دا کە ئەنفال چۊ تاوان جینۆساید و تاوان جەنگ دژ وە مرۆڤایەتی هەژمار بکریەێد"، و دووپات کردە لەبان هەوەجەی هەڵسان حکومەت فیدراڵی وە قەرەبووکردن قوربانییەیل، هاوەخت وەگەرد وەردەوامبۊن لە تەقەلا رژدەیل ئەرا ناساننی وە شیوەیگ ناودەوڵەتی چۊ جینۆساید.
و لە قسەیلی وتیش کە "میژوویگ پڕ لە تاوانەیل بایەسە ئاڵشت بوود ئەرا پەن و وانەیگ ئەرا ریگریکردن لە دووارەبۊن ستەم و دەسدرویژیەیل و ئەرا مقیەتیکردن مافە دەستوورییەیل گەل کوردستان"، وە داواکردن ئەرا قایمکردن تەبایی و یەکڕزی و وەیەکەوژیان ئاشتییانە ئەرا مسۆگەرکردن بانانیگ ئارام ئەرا گشت لایگ.
سەرۆک هەرێم کووتایی وە بەیاننامەگەی هاورد وە یادهاوردن و رێزگرتگدن لە هەڵوێست نیشتمانی و مرۆیی خەڵک هەولێر و دەورگردی وە دەسمیەتیداین لەلیقەومیاگەیل بادینان لە رووژە سەختەیلیان لە ئۆردگای "جەژنیکان".
