بارزانی دووپات لەبان پابەندبۊن وە دەستوور کەێد ئەرا وەجیهاوردن ئارامی و چارەسەرکردن کیشەیل عراق
شەفەق نیوز- هەولێر
سەرکردەی کورد مەسعود بارزانی، رووژ سێشەممە، دووپات لەبان گرنگی پابەندبۊن گشت لایەنەیل وە دەستوور کرد ئەرا وەجیهاوردن ئارامی و چارەسەرکردن کیشەیل لە عراق.
یەیش مەوقەی پیشوازیکردنی لە کەسایەتی دیار بریتانی و سەرۆک فەخری ئەرا یەکێتی دیموکرات ناودەوڵەتی (IDU) لۆرد مایکڵ ئاشکرۆفت هات.
لە دیدارەگە، بارزانی پیشوازی لە ئاشکرۆفت کرد، و کوڵەیگ لەباوەت میژوو خەبات گەل کوردستان و قوربانییەیلی ماوەی سەد ساڵ گوزەشتە پیشکەش کرد، وە دیاریکردن کلتوور وەیەکەوژیان کە گەل کوردستان وەپی جیاوازە، و دووپاتکردن گرنگی چارەسەرکردن دۆسیەی رەوای گەل کورد لەڕی گفتوگۆ و ریەیل ئاشتییانە.
هەمیش بارزانی رووشنایی خستە بان رەوشەیل لە عراق، وە دووپاتکردن لەبان گرنگی پابەندبۊن گشت لایەنەیل وە دەستوور ئەرا وەجیهاوردن ئارامی و چارەسەرکردن کیشەیل.
لەلای خوەیەو، ئاشکرۆفت خوەشاڵی خوەی وە سەردانکردن هەرێم کوردستان دەرخست، وە دیاریکردن رێزگردنی ئەرا ئەو گامەیلە کە گیریەسە وەر لە رێڕەو چاکسازی و سەقامگیری و وەپیشکەفتن لە هەرێم.
ئاشکرۆفت دووپات لەبان گرنگی ناسانن راسی هەرێم کوردستان و دۆسیەی کورد وە شیوەیگ خاستر لە کۆڕە ناودەوڵەتییەیل کرد، وە پەسنکردن ئەو قوربانییەیلە کە هێزەیل پێشمەرگەی کوردستان لە جەنگ دژ وە ریخریاگ داعش پیشکەشی کردنە.
