باڵوێزخانەی ئۆکرانیا لە بەغداد بڵاوکردن درۆن لە هەرێم کوردستان رەدکەێد و راپۆرتیگ ئیرانی وە دروو زانێد
شەفەق نیوز - بەغداد
باڵوێزخانەی ئۆکرانیا لە کۆمار عراق، ئمڕوو چوارشەممە، بانگەشەیلیگ کە راگەیاننەیل ئیرانی بڵاوی کردوین لەبان بڵاوکردن فڕۆکەی بیفڕۆکەوان (درۆن) وەلایەن کیێڤ لە هەرێم کوردستان رەدکەێد، و داوا کرد کە "دۊزەو" بوون و دویرەوبکەفن لە بڵاوکردن "بانگەشەیل نەچەسپیاگ".
یەیش جویر جواویگ هات ئەرا راپۆرتیگ کە ئاژانس "تەسنیم" ئیرانی بڵاوی کردوێد، کە وەپای سەرچەوەیگ ئەمنی کە ناسنامەی ئاشکرا نەکردگە، و بانگەشەی ئەوەگ کەێد ئۆکرانیا یەکەیل و هەزاران فڕۆکەی بیفڕۆکەوان لە هەرێم بڵاو کردگە.
باڵوێزخانەگە لە بەیاننامەیگ فەرمی کە رەسیە ئەرا ئاژانس شەفەق نیوز راگەیان "ئێ بانگەشەیلە وە تەواوی دویر لە راسی، و چەواشەکارییگ ئەنقەستن"، و دووپات کرد لەوەگ کیێڤ "هویچ فڕۆکەیگ بیفڕۆکەوان یا یەکەیل سەر وە خوەی یا کەسایەتیەیل پەیوەنیدار وە خوەی بڵاو نەکردی، نە لە هەرێم کوردستان و نە لە هویچ شوونیگ ترەک لە عراق".
بەیاننامەگە دیاری کرد ئۆکرانیا "رێز تەواو لە سەروەری کۆماری عراق و سەربەخوەیی خاکەیلی گرێد، و شانازی کەێد وە پەیوەنیەیل دووستایەتی کە بەسێدەی وە حکومەت فیدڕاڵی و حکومەت هەرێم کوردستان".
