يه‌كێتى هه‌ڵويست عه‌ره‌ب و توركمان ئدانه ئه‌كا له‌باره‌ى كۆمسيۆن هه‌ڵوژاردنه‌يل له كه‌ركوك
شه‌فه‌ق نيوز/ نوێنه‌ره‌يل كه‌ركوك له‌بان ليست يه‌كێتى نيشتمانى كوردستان، ئدانه‌ى هه‌ڵويست نوێنه‌ره‌يل عه‌ره‌ب و توركمان كردن له پاريزگاگه له‌وه‌ر ئه‌وه‌گ دامه‌زرانن تازه ره‌ته‌و كردنه ك له‌لايه‌ن كۆمسيۆن باڵاى سه‌روه‌خوه‌ى هه‌ڵوژاردنه‌يل ئه‌نجام درياگه.
له‌ى باوه‌ته‌و، نوێنه‌ره‌يل فراكسيۆن يه‌كێتى نيشتمانى له كه‌ركوك له به‌ياننامه‌يگ ئه‌را ئاژانس شه‌فه‌ق نيوز، ئه‌وه ده‌رخستن ك جواو داواكارى رووڵه‌يل ملله‌ت له خوه‌ينيشانده‌ره‌يل درياسه‌وه‌و ئه‌نجومه‌ن نوێنه‌ره‌يل ياساى تازه‌يگ داناگه ئه‌را هاوردنه‌وه‌ى كۆمسيۆن باڵاى سه‌روه‌خوه‌ى هه‌ڵوژاردنه‌يل و وه‌گووره‌ى ئه‌وه‌يش ئه‌نجومه‌ن كۆميسياره‌يل و ئه‌ندامه‌يلى له دادوه‌ره‌يل و راوێژكاره‌يل پيك هاورياگه و ئيسه‌يش هويچ لايه‌نيگ هه‌ق ئه‌وه نه‌يرێد ده‌خاڵه‌ت له كاروبار كۆمسيۆن بكا جوور ئه‌وه‌گ زويتر ئه‌نجام دريا.
به‌ياننامه‌گه وت: له‌وه‌ختيگ ك رووڵه‌يل پاريزگاى كه‌ركوك هه‌وه‌جه وه پته‌وكردن شيرازه‌ى ژيان هاوبه‌ش و برايه‌تى و كاركردن له‌بان جيگيركردن ئاسايش و سه‌قامگيرى و دابينكردن خزمه‌تگوزارى ديرن، سه‌رمان سوڕمينێد له لايه‌نه‌يليگ به‌ياننامه و هه‌ڵويست ده‌رخه‌ن دوير له وه‌رپرسيارێتى له‌وه‌ر زه‌فه‌رهاورن له كۆمسيۆن باڵا له پاريزگاگه له لايگ و تومه‌تباركردن باقى پيكهاته‌يل و لايه‌نه‌يل تر له‌لايگ تره‌و وه ئامانج كاريگه‌رى له‌بان كار كۆمسيۆن هه‌ڵوژاردنه‌يل و ده‌خاڵه‌تكردن له كاروبارى.
