کوشیان چوار کەس وە پەلاماریگ چەکدار لە دیالە
شەفەق نیوز/ سەرچەوەیگ ئەمنی لە پارێزگای دیالە، ئمڕوو چوارشەممە، خەوەردا لە کوشیان ٤ مەدەنی و زەخمداری پەنجەمیان وە پەلاماریگ چەکدار لەلایەن نەناسریایلیگ لە خوەرهەڵات پارێزگاگە.
سەرچەوەگە ئەرا ئاژانس شەفەق نیوز وت: چەکدارەیلیگ نەناسریاگ لەناو ماشینیگ مارکەی ئەلەنترا رەنگ چەرمگ، تەقە لە ماشینیگ مەدەنی مارکەی جێب شیرۆکی لەبان ری مەنەلی - بەلەدرووز کردن.
سەرچەوەگە دیاری کرد ک رووداوەگە بویە هووکار کوشیان چوار کەس و زەخمداری کەسیگ تر.
سەرچەوەگە وتیش؛ کوشیایلە وەرجەیە لە خەڵک ناحیەی مەنەلی بوینە، و ئیسە لە ئاوای شەیمای سەروە ناحیەی خان بەنی سەعد جیگرن، ک لە مەوقەی گلەوخواردنیان لە سەردان یەکیگ لە کەسوکارەیلیان لە مەنەلی کەفتنە وەر گولەی چەکدارەیلە، ک بویە هووکار کوشتنیان و زەخمداری یەکیگیان.
سەرچەوەگە دیاری کرد ک تەرم قوربانیەیل وزەخمدارەگە وەرەو خەسەخانە بریان، و دەسەڵاتەیلە لێکۆڵینەوەیگ لە رووداوەگە واز کردن.
