کوشیان ژنیگ و مردن پیاویگ ئەمنی و زەخمداربۊن دوو جفتیار وە رۊداوەیل جیاجیا لە عراق
شەفەق نیوز- دیالە/ ئەنبار/ نەجەف
دوو جفتیار وە زەخمەیل سووکیگ زەخمدار بۊن، ئمڕوو دووشەممە، وە مدوو تەقیان جیماگەی جەنگی کۊن لەناو بووسانیگ لە ناحیەی عزێم لە باکوور پارێزگای دیالە، وەپای ئەوەگ سەرچەوەیل ئەمنی ئەرا ئاژانس شەفەق نیوز خەوەر دان.
لە قەزای خانەقین لە باکوور خوەرەڵات دیالە، ژنیگ لەناو ماڵەگەی کوشیا، لە وەختیگ سەرچەوەیل وتن کە شۊ وەرینی توومەتبارە وە جیوەجیکردن تاوانەگە، لە وەختیگ دەزگایەیل ئەمنی دەس کردنە لێکۆڵینەوە و جیوەجیکردن رێکارەیل.
لە پارێزگای ئەنبار، موفەوەزیگ لە بەش نەهیشتن تەقەمەنییەیل گیان لەدەس دا وە مدوو تەقینەوەی جیماگەیل جەنگی هن ریخریاگ داعش، مەوقەی جیوەجیکردن ئەرکەگەی لە نزیک شار عانە لە خوەرئاوا پارێزگاگە.
سەرچەوەیگ ئەمنی، ئەرا ئاژانس شەفەق نیوز وت، کە موفەوەز نەزیر محەمەد فتنە موحسین، کە سەر وە بەش نەهیشتن تەقەمەنییەیل ئەنبارە/ بەش عانە، گیان لەدەسدا وە مدوو تەقیان جیماگەی جەنگییەیل مەوقەی ئەرکیگ مەیدانی.
لە نەجەف، پولیس ئاوی تۊنست ژنیگ لە خنکیان قورتار بکەێد دۊای ئەوەگ خوەی فڕە دا لەبان یەکیگ لە پیەڵەیل ئەرا ناو چەم کووفە.
سەرچەوەیگ ئەمنی ئەرا ئاژانس شەفەق نیوز وت کە پولیس ئاوی ژنەگە قورتار کردن دۊای کەفتنی ئەرا ناو ئاو چەمەگە وە مدوو فڕەداین خوەی لە پیەڵەگەو، دیاری کرد کە لە یەکیگ لە پارێزگا هاوسایەیل نەجەفەو هاتیە.
هەمیش وت کە هیزە ئەمنییەیل ژنەگە بردن ئەرا جیوەجیکردن رێکارەیل یاسایی، لە وەختیگ مدووەیل رۊداوەگە یا رەوش تەندروسیی ئاشکرا نەۊە.
