کوشیان پیاویگ عراقی وەگەرد دویەتەگەی لە رویوەڕیوبوین خەرتووم
یەیش دویای چەن ساعەتیگ لە راگەیانن وەزارەت دەیشت عراق لە بەغداد تیەێد ک وت ١٤ عراقی لە خەڕتووم رەسانیەسە شوینیگ ئارام لە ناوچەی بورتسودان.
میدیایل لە زوان پەرلەمانتاریگ قەتەری وتن: پیاویگ عراقی لەناو تەمەن پەنجا ساڵە خوەی و دویەتەگەی لەناو رویوەڕیوبوین خەرتووم کوشیاگە، و دیاری کرد ک قوربانیەگە خەڵک پارێزگای سەڵاحەدینە، و یە چەن ساڵیگە لە سودان نیشتەجی بویە.
ئەو پەرلەمانتارە ک ناو خوەی ئاشکرا نەکرد، دووپات کرد ک دوو قوربانیەگە لەناو ماڵ خوەیان بوینە، و وەگورزیگ لە جەنگ ناوبەین سوپای سودان و هیزەیل پاڵپشتیکردن زوینە کوشیانە.
سیاسەتمەداریگتر خەڵک پارێزگای سەڵاحەدین وت: دوو قوربانیەگە خەڵک شار بێجی بوینە لە پارێزگای سەڵاحەدین، وتیش زەخمدارەیل عراقییش هەس.
وەگورەی سایت قەتەری، ئەو سیاسەتمەدارە وت: بەیاننامەیل وەزارەت دەیشت عراق لەباوەت تەقەلای مقیەتیکردن هاووڵاتیەیل عراق لە خەرتووم راسی نیین، و بایەت بوی هەماهەنگی وەگەرد لایەنەیلیگ لەناو سودان بکرداد، هەکاتی سعودیە و دەوڵەتەیلیگتر ئەرا مقیەتیکردن گیان عراقیەیل لەورا، وتیش: خانەوادەی قوربانیەیل هیمان گیر هاتنە، و تەرم قوربانیەیل گلەو نەدریا، هەرچەن یە دوو رووژە رویداوەگە بویە.
