چوارچیوەی هەماهەنگی بانگواز ئەرا لایەنگرەیلی کەێد خوەینشاندان بکەن
شەفەق نیوز/ چوارچیوەی هەماهەنگی ک هیزەیل شیعە هاناوی بیجگە رەوت سەدر، ئمڕوو شەممە، بانگەواز ئەرا جەماوەرەیلی کرد لەنوای خوەینشاندان رەوت سەدر ئەوانیش خوەینشاندان بکەن.
چوارچیوە لە بەیاننامەیگ رەسیە ئاژانس شەفەق نیوز وت: وە نیگەرانی فرەیگ نووڕیمنە ئەو رویداوەیلە خەفتباریە ک بەغداد پایتەخت لەی رووژەیلە وەخوەی دوینێد، تایبەت پێشێلکاری لەبان دامەزراوەیل دەستووری و وەناوچگن ئەنجومەن نوینەرەیل وهەڕەشە وە پەلامارداین دەسەڵات دادوەری و پەلامارداین بارەگایل فەرمی و دەزگا ئەمنیەیلە.
بەیاننامەگە وتیش: ئیمەیش لە وەختیگ تەمەی خوەیگردن و بەرزترین پلەیل سەبر وئامادەبوین کەیمن، بانگواز ئەرا جەماوەرەیل گەل عراق کەیمن باوەڕ وە یاسا و دەستوور وشەرعیەت و دەستوور دیرن، دەربچن ئەرا خوەینشاندان ئاشتەوایی ئەرا مقەیەتیکردن دەوڵەت وشەرعیەتی و دامەزراوەیلی و لەنوایان دەسەڵات دادوەری و تەشریعی و وسیان لەنوای ئی پێشێلکاری رخبەرە و دەرچگن لە یاسا و رسوومەیل و شەریعەت.
چوارچیوەی هەماهەنگی لە بەیاننامەگەی بارەگە خستە حکومەت ک گشت وەرپرسییگ لە مقەیەتیکردن دامەزراوەیل دەستووری هەڵگرێد، و هەمیش بارەگە وەبان ئەو لایەنەیل سیاسیە خست ک هانە پشت ئی تونەڕەویە و پێشێلکاری لەبان دەوڵەت و دامەزراوەیلی، گشت وەرپرسییگ خەیمنە بانیان لە هەرچشتیگ ئاشتەوایی ئەهلی بکەفێدە وەری لە پشت ئی کارەیلە ک دژوە یاسا وسیانە.
بەیاننامەگە وتیش: دەوڵەت وشەرعیەتی و دامەزراوەیل دەستووری و ئاشتەوایی خەڵکەگە کڕیگ سوورە، بایەتە گشت عراقیەیل ئامادە بوون ئەرا وەرگریکردن لەلی وەگشت شیوەیگ ئاشتەوایی.
