گوایە خوەیکوشتیە.. ناوخوەیی: پیاویگ ژنەگەی خوەی لە نزیک مووسڵ کوشێد
قسەکەر ناوخوەی عەمید موقداد میری لە بەیانامەیگ ئمڕوو راگەیان، بەش دژە تاوانەیل تلعفەر وە هەماهەنگی وەرد بەش پۆلیس بەعاج لە فەرماندەیی پۆلیس پارێزگای نەینەوا خەوەر وەپیان رەسیە لە پسای خوەیکوشتن ژنیگ لەناو ماڵ خوەی لە یەکیگ لە ئوایەیل سەر وە قەزای بەعاج خوەرئاوای شار مووسڵ.
ئاشکەرایکرد وەپای وتەیل شویەگەی و لەدویای ئاشکەراکردن و پلاندانان لە شوین رویداوەگە و کووەوکردن بەڵگەیلە و گشت چشتیگ پەیوەست وە رویداوەگە و قویڵەوبوین لە لێکۆڵینەوە وەرد شوی قوربانیەگە کە تاوانبارە ( ح ر ز ا ) کەمتر لە 12 ساعەت تاوان کوشتنەگە ئاشکەرابوی لەدویای ئەوە شوی قوربانیەگە دان وە تاوانەگەی دانا کە تاوان کوشتن ژنەگەی ئەنجامدایە وە مدوو گیچەڵ و دەمەقاڵ خێزانی.
وتیش، رێکارەیل یاسایی وەرانوەری گیریایە و وتەیل سەرەتایی لەلی وەرگیریاس وەپای مادەی 406 یاسای عراقی زیندانی کریاس.
