وەچەوەڕی سزایلیگ زیاتر.. ٩٨ ساڵ زیندانی لەبان وەرپرسیگ وەرین لە نەینەوا

شەفەق نیوز/ سەرچەوەیگ ئەمنی لە پارێزگای نەینەوا، ئمڕوو دووشەممە، خەوەردا ک شمارەی ئەو فەرمانەیلە ک لەبان وەڕیەوبەر تاپوو زهور دەرچگە لە تاوانەیل ساختەکاری رەسیە ٨٨ ساڵ، وهیمان چەوەڕی سزایلیگ زیاتر کەێد.  

سەرچەوەگە ئەرا ئاژانس شەفەق نیوز وت : دەزگای دەسپاکی توەنست تووڕیگ بچەکنێد شمارەیان رەسیە زیاتر لە ١٠ کەس لەناویان فەرمانبەرەیلیگ لە تاپوو زهور وبەش ماڵداری لە شارەوانی مووسڵ، وە دەسکاریکردن و ساختەکاری وە ماڵداری گشتی و تایبەت.  

سەرچەوەگە وتیش: وەزارەت داد فەرمانگەگە ئەرا زیاتر لە ساڵیگ دویای ئەوە بەسا، ئەرا هویردە نووڕیژ ودویای چەن مانگیگ دووارە وازی کرد.  

وتیش: بڕ ئەو سزایلە ک لەبان توومەتبارەگە  ( ف. ح. ط) وەڕیەوبەر وەرین تاپو زهور وە باوەتەیل ساختەکاری دەرچگە رەسیە ٩٨ ساڵ، وهیمان و تر هەس فەرمانیان دەرنەچگە.