وە مدوو "ئاڵشتبوین گەرمی".. روانگەیگ ژینگەیی هوشیاری دەێد لە دووپاتەوبۊن بوو گوگرد و پیسبۊن لە بەغداد
شەفەق نیوز - بەغداد
روانگەی "عراق سەوز" تایبەتمەن وە کار ژینگەیی، ئمڕوو جمعە، مدوو بڵاوبۊن بوو گوگرد لە پایتەخت بەغداد، گلەو دا ئەرا بەرزەوبۊن ئاستەیل پیسبۊن و ئاڵشتکاری پلەیل گەرمی، و چەوەڕی دووپاتەوبۊن ئی دیاردە کرد ماوەی رووژەیل ئاییندە.
روانگەگە لە راپۆرتیگ وت، کە ئاڵشتکاری لە پلەیل گەرمی و شیویان کەشوهەوا وە شیوەیگ راسەوخۆ دەسمیەتی دانە لە زیایبۊن تونی پیسبۊن وا و خەسبۊن بوو گوگرد لە بەغداد، و دیاری کرد کە ئی هوکارەیلە سەرچەوەی راسی ئەرا بووەگە نین، بەڵکم وە هوکاریگ دەسمیەتیدەر هەژمار کریەێد کە ئەو پیسکەرەیلە کە لە چالاکییەیل ئایەم تیەن لە نزیک روی زەوی گیر خەێد لەناو دیاردەیگ کە وە (ئاڵشتبوین گەرمی) ناسریەێد.
وتیش کە پیسکەرەیل ترەک، چۊ سزانن سزەمەنی قورس (نەفت سییە) لە ویستگەیل بەرهەمهاوردن کارەبا و پاڵاوگەیل نەفت و کارخانەیل، و بڵاوبۊن کارخانەیل خشت و ئەسفەڵت لە دەورگرد پایتەخت، لە شان سزانن جیماگە پلاستیکییەیل و خاشاک لەناو شوینەیل ژیرخاککردن هەڕەمەکی، ئەوانیش دەسمیەتی دانە لە خەراوبۊن قەیران پیسبۊن لە بەغداد.
روانگەگە هوشیاری دا لەوە کە ئی پیسبۊنە شایەت بوودە مدوو شوینەوارەیلیگ تەندروسی رخبار ئەرا هاووڵاتییەیل، و وە تایبەت کەسەیل وەساڵاچگ و مناڵەیل، کە خوەی دوینێد لە نۆرەیل تەنگەنەفەسی تون، و شیویان کارەیل سۊەیل لەبان مەودای دریژ، لە شان بیمارییەیل دڵ و لۊلەیل خۊن و جەڵتەیل مێشک، و هەسەوەری چەو و لۊت و قوڕگ، و سەرژان و بیمارییەیل پووس.
