وەرجە سەردانەگەی.. زەیدی وەزیر نەفت کل کەێد ئەرا سعوودیە ئەرا "ئامادەکردن دۆسیە گەوراگە"

شەفەق نیوز- بەغداد

سەرچەوەیگ حکومی، رووژ دووشەممە، ئاشکرا کرد لە چگن وەزیر نەفت باسم محمد خزەیر، ئەرا سعوودیە، ئەرا ئامادەکردن دۆسیەیل وە ئامادەکاری ئەرا سەردان سەرۆک حکومەت عەلی زەیدی، و دیارترینیان وەگەڕخستن کڕ هاوبەش کلکردن نەفتە.

سەرچەوەگە ئەرا ئاژانس شەفەق نیوز وت، کە "لە گرنگترین ئەو تەوەرەیلە کە وەرد وەرپرسە سعوودییەیل باس لەلییان کریەێد، سەرلەنوو وەگەڕخستن کڕ لویلەی نەفت هاوبەشە ئەرا کلکردن نەفت عراقی، وەرەو بەندەر یەنبوع سعوودی تا رەسێدە بازاڕە جەهانییەیل نەفت".

وتیش کە "لە ناو ئەو دۆسیەیل ترەکە کە سەرۆک وەزیرەیل لە سعوودیە باسیان کەێد، میکانیزم ئارامکردن وەرد یەمەن وەگەرد دیاریکردن هەڵویست عراق لەوەگ لە ناوچەگە روی دەێد، و گرنگی وسانن ململانێ عەرەبی - عەرەبی و زوورهاوردن لەبان ئارامکردن".

وتیش کە "سەردان زەیدی ئەرا کوەیت، باسکردن لە دۆسیەی کیشان سنوورە دەریاییەیل، و دۆسیەی خۆر عەبدلڵڵا و مافە ئاوییەیل عراق لەخوەی گرێد، وەگەرد باوەتەیل ترەک کە جی گرنگیپیدان هەردوگ وڵاتن".

چەوەڕی کریەێد سەرۆک ئەنجومەن وەزیرەیل عراقی عەلی زەیدی، رووژ چوارشەممەی ئایندە گەردینیگ کەنداوی بکەێد کە شانشین عەرەبی سعوودی بگرێدەو، و دۊای ئەوەیش بچوودە دەوڵەت کوەیت.

ئی گەردین چەوەڕیکریاگە دۊای هەڵوەشانن سەردانیگ تیەێد کە بڕیار بۊ زەیدی ئەرا ریاز بیکەێد لە تەمموز/ یۆلیۆی گوزەشتە، لەبان پیشهاتە ئەمنییە خێرایەیل لە ناوچەگە.

پەیوەندییەیل عراقی - کەنداوی رەوشیگ لە چەوەڕی و وریایی وەخوەیەو دۊنێد لە وەخت دەسوەپیکردن ئۆپراسیۆنە سەربازییە هەرێمییەیل لە شوبات/ فێبرواری 2026ـەو، لەناو توومەتبارکردن وەردەوام لەلایەن دەوڵەتەیل ناوچەگەو ئەرا گرووپە چەکدارەیل وە وەکارهاوردن خاک عراق ئەرا ئەنجامداین پەلامار وە فڕۆکەی بیفڕۆکەوان کە بەرژەوەنییە ئابوورییە هەرێمییەیل کردۊدە ئامانج.

کڕ نەفت هاوبەش، وە دیارترین پرۆژەیل لە ناوەین عراق و سعوودیە هەژمار کریەێد، و ئەرا نزیکەی 1,568 کیلۆمەتر دریژەو بوود، و لە کیڵگەی زوبەیر لە بەسرەو دەس وەپی کەێد تا رەسێدە یەنبوع سعوودیە.

لە هەشتایەیل سەدەی گوزەشتە دەس کریا وە کارکردن لەبانی، وەلی کارکردن لەبانی لە ساڵ 1990 وسیا، لە وەخت پەلامارداین رژیم وەرین لە عراق ئەرا بان کوەیت، و لە ساڵ 2001، سعوودیە بڕیگ لە بەشەیل کڕەگە لەناو خاک خوەی وەکار هاورد، ئەرا بەسانن لوولەی "خوەرئەڵات – خوەرئاوا"، کە ئمڕوو وە جیگریگ ستراتیژی ئەرا تەنگەی هورمز هەژمار کریەێد، لەوەگ پەیوەندی وە کلکردن نەفت دیرێد.